Kuri uyu wa gatandatu tariki 28 Ukwakira 2023; mu Midugudu igize Akarere ka Burera habereye umuganda rusange usoza ukwezi k’Ukwakira 2023.

Umuganda waranzwe n'ibikorwa birimo kubakira imiryango ifite amikoro make inzu n'ubwiherero, kubumba amatafari no gutunda amabuye byo kuzubakisha, ibikorwa bigamije guteza imbere isuku n'isukura no kurwanya isuri.

Umuyobozi w'Akarere w'agateganyo, NSHIMYIMANA Jean Baptiste; hamwe n'ubuyobozi bw'Umurenge wa Cyanika, inzego zitandukanye zihakorera n'abaturage b'Akagari ka Gasiza bateye ibiti muri aka Kagari mu rwego rwo gukumira no kurwanya isuri n'ibiza n'ingaruka ziterwa na byo.

Abagize Inama Njyanama y'Akarere, Ubuyobozi bw'Umurenge wa Gatebe, inzego zitandukanye zikorera muri uyu Murenge n'abaturage b'Akagari ka Musenda bafatanyije gusiza ikibanza kizubakwamo ishuri ry'imyuga, tekiniki n'ubumenyi ngiro mu Kagari ka Kabuga.

Mu butumwa; Umuyobozi w'Akarere w'agateganyo, NSHIMYIMANA Jean Baptiste yahaye abaturage bitabiriye umuganda mu Kagari ka Gasiza/Cyanika ; bwatanzwe mu biganiro byabaye nyuma y'umuganda mu Karere hose; yabakanguriye kugira isuku umuco, kwirinda ubusinzi, kwirinda ibikorwa byo kwishora mu biyobyabwenge, kurwanya isuri n'ibiza; bacukura, banasibura imirwanyasuri n'ibyobo bifata amazi; kandi bazirika neza ibisenge bw'inzu zabo , kurwanya imirire mibi n'igwingira no kwirinda amakimbirane.

Yabakanguriye kandi kwirinda ihohotera aho riva rikagera, gukora cyane no kunoza umurimo hagamijwe kwiteza imbere no kwirinda icyo ari cyo cyose cyabangamira ubumwe bw'Abanyarwanda

Nyuma y'umuganda rusange ; mu Midugudu igize Akarere habereye amatora yo kuzuza inzego z'ibanze n'izihariye.

Hatowe abuzuza Komite Nyobozi y'Umudugudu, abagize Biro y'Inama Njyanama y'Umudugudu, usimbura Umujyanama uhagarariye Umudugudu mu Nama Njyanama y'Akagari, abuzuza Komite Nyobozi y'Inama y'Igihugu y'Urubyiruko n'iy'Abagore ku rwego rw'Umudugudu.

Umuyobozi w'Akarere w'agateganyo, Bwana NSHIMYIMANA Jean Baptiste yasabye abatowe kurangwa n'imikorere myiza n'imikoranire myiza n'izindi nzego; batanga serivisi nziza ku baturage