Kuri uyu wa gatandatu tariki 16 Ukuboza uyu mwaka; mu Karere ka Burera habereye amarushanwa yo gusiganwa ku magare yiswe UMUSAMBI GRAVEL RACE agamije kubungabunga urusobe rw’ibinyabuzima bibarizwa mu gishanga cy’Urugezi harimo n’inyoni y’Umusambi.

Aya marushanwa yateguwe na Rwanda Wildlife Conservation Association ( RWCA) ku bufatanye n'inzego zitandukanye harimo Minisiteri ya siporo n'umuco, Federasiyo y’u Rwanda y’umukino w’amagare (FERWACY) n’Akarere ka Burera.

Yitabiriwe n'icyiciro cy'abasanzwe bitabira amarushanwa yo gusiganwa ku magare babikora nk'umwuga (Professionals), abitabira amarushanwa yo gusiganwa ku magare bagamije kwidagadura (amateurs) n'icyiciro cy'abatwara amagare bisanzwe bakoresheje amagare y'ubwoko bwa pine balo.

Icyiciro cy'ababigize umwuga bahereye ku Ibanda, mu Murenge wa Kivuye; icyiciro cy'abayitabiriye mu rwego rwo kwidagadura batangiriye muri santere ya Rusumo, mu Murenge wa Butaro; naho icyiciro cy'abakoresheje pine balo bahereye amarushanwa muri santere ya Rwerere, mu Murenge wa Rwerere. Ibyiciro byose byasoreje amarushanwa ku Ibanda, mu Murenge wa Miyove, mu Karere ka Gicumbi.

Umuyobozi w'Akarere ka Burera, Mme MUKAMANA Soline, Umuyobozi wa Polisi mu Karere, SSP Aphrodis NKUNDINEZA n'Abanyamabanga Nshingwabikorwa b'Imirenge ya Butaro, Rwerere, Rusarabuye na Gatebe bakurikiranye aya marushanwa.

Aya marushanwa yitabiriwe kandi n'Umuyobozi w'Akarere ka Gicumbi, Mme UWERA Parfaite hamwe n'Abayobozi b'izindi nzego mu Karere ka Gicumbi.

IYAMUMPAYE  Jacqueline wo mu Murenge wa Cyeru na IGISUBIZO Vanessa wo mu Murenge wa Kivuye bahembwe mu bakobwa bitabiriye aya marushanwa bakoresheje pine balo.

Mu ijambo rye; Umuyobozi w'Akarere ka Burera, Mme MUKAMANA Soline yashimye inzego zateguye aya marushanwa ndetse n'abayitabiriye; ashishikariza abaturage bakurikiranye aya marushanwa gukunda no gukora siporo; abibutsa ko gukora siporo bituma umuntu agira ubuzima bwiza.

Mu baje mu myanya ya mbere muri aya marushanwa harimo abahembwe amagare ya siporo; abandi bahabwa ibindi bihembo bitandukanye