Kuri uyu wa  gatanu tariki 19 Mata uyu mwaka; itsinda rigizwe n'abagize Komite Nyobozi y'Akarere, abagize Inama Njyanama y'Akarere, abakozi b'Akarere bakorera ku cyicaro cyako, Perezida wa AVEGA mu Karere, MUKANSIGAYE Marguerite, Perezida wa IBUKA mu Karere, NIYONIZERA Méthode, abashinzwe imiyoborere myiza mu Mirenge, Umunyamabanga Nshingwabikorwa w'Akagari wari uhagarariye abandi, ushinzwe imibereho myiza n'iterambere mu Kagari wari uhagarariye abandi, Abayobozi b'Imidugudu bari bahagarariye abandi mu Mirenge na bamwe mu rubyiruko bari bahagarariye abandi basuye Urwibutso rwa Jenoside yakorewe Abatutsi mu 1994 rwa Murambi, mu Murenge wa Gasaka, Akarere ka Nyamagabe.

Nyuma yo kwakira abagize iri tsida,ry’Akarere ka Burera, umukozi ushinzwe uru Rwibutso yabasobanuriye mu ncamake uko Abatutsi bahungiye aha i Murambi baturutse mu byari Komine Karama, Mudasobwa, Kinyamakara na Nyamagabe bizeye kuharokorera bishwe urw'agashinyaguro

Umuyobozi w’Akarere, Mukamana Soline yagaragaje ibyiciro bigize itsinda ryasuye uru Rwibutso n’intego y’iki gikorwa agira ati:" Gusura uru Rwibutso biri mu bikorwa biteganyijwe mu Karere ka Burera bijyanye no kwibuka mu minsi ijana Jenoside yakorewe Abatutsi mu 1994."

Yagize kandi ati:"Kurusura bituma kandi habaho kurushaho kumenya no gusobanukirwa amateka ya Jenoside yakorewe Abatutsi mu 1994; cyane cyane urubyiruko; bikaba bituma hirindwa,hakanarwanywa ingengabitekerezo ya Jenoside yakorewe Abatutsi, ipfobya n’ihakana ryayo; bityo turusheho kwimakaza gahunda ya Ndi Umunyarwanda."

Nyuma yo kwerekwa ibice bigize uru Rwibutso, gusobanurirwa amateka ahabitse no gusobanurirwa uburyo ibimenyetso bya Jenoside yakorewe Abatutsi bibungabungwa;  abagize itsinda ry'Akarere ka Burera bashyize indabo ku Imva ishyinguyemo Abatutsi 50,000 bazize Jenoside bahiciwe ndetse n’abiciwe mu nkengero zaho; bafata kandi umunota wo kwibuka abagize Jenoside yakorewe Abatutsi mu 1994.