Mu rwego rw'ibikorwa byo Kwibuka ku nshuro ya 31 Jenoside yakorewe Abatutsi mu minsi ijana; uyu munsi, itsinda ryaturutse mu Murenge wa Butaro rigizwe n’Umunyamabanga Nshingwabikorwa wawo, Perezida w’Inama Njyanama yawo n’abandi barimo urubyiruko bari bahagarariye ibyiciro binyuranye mu Murenge basuye Urwibutso rwa Jenoside yakorwe Abatutsi rwa Nyanza ya Kicukiro, mu Karere ka Kicukiro, Umujyi wa Kigali; bakaba bari kumwe n’Umuyobozi w’Akarere, Mukamana Soline.

Abagize iryo tsinda bageze aho ku Rwibutso rwa Nyanza ya Kicukiro bakiriwe n’umukozi ushinzwe urwo Rwibutso; wabasobanuriye amateka yerekeye urwo Rwibutso; abereka ibice bigize urwo Rwibutso n’uko amateka yerekeye Jenoside yakorewe Abatutsi abungabunzwe.

Abagize iryo tsinda bafashe umunota wo kwibuka abazize Jenoside yakorewe Abatutsi; bashyira n’indabyo ku imva ishinguyemo imibiri igera ku bihumbi ijana na bitanu by'Abatutsi bazize Jenoside bahiciwe.

Aganira n’abagize iryo tsinda, Umuyobozi w’Akarere yagize ati:"Gusura uru Rwibutso biri muri gahunda y’ibikorwa byo Kwibuka ku nshuro ya 31 Jenoside yakorewe Abatutsi mu minsi ijana. Bituma turushaho kumenya; cyane cyane urubyiruko uko Jenoside yakorewe Abatutsi yateguwe, uko yashyizwe mu bikorwa, uko yahagaritswe, ingaruka zayo n’aho Igihugu kigeze mu rugendo rwo kwiyubaka; bityo bidufashe kurushaho kurwanya ingengabitekerezo ya Jenoside yakorewe Abatutsi, ihakana n’ipfobya rya Jenoside yakorewe Abatutsi."

Yasabye abagize iryo tsinda kwirinda no kugira uruhare mu kurwanya ingengabitekerezo ya Jenoside yakorewe Abatutsi, ihakana n’ipfobya rya Jenoside yakorewe Abatutsi n’ikindi cyose cyabangamira gahunda ya Ndi Umunyarwanda, ubumwe n’ubudaheranwa by’Abanyarwanda.