Mu nama y’ubuzima yaguye y’Akarere ka Burera yabereye uyu munsi mu Kagari ka Nyamabuye, mu Murenge wa Kagogo; Umuyobozi w’Akarere, Mukamana Soline yasabye abayitabiriye gufatanya kuzamura ibipimo by’ubuzima bashyira imbaraga mu gukemura ikibazo cy’imirire mibi n’igwingira ry’abana bato n’ibindi bibazo bituma intego Akarere kihaye itagerwaho kuri bimwe mu bipimo by’ubuzima.

Inama yitabiriwe n’abagize Komite y’umutekano itaguye y’Akarere, Abanyamabanga Nshingwabikorwa b’Imirenge, Abayobozi b’Ibigo Nderabuzima, itsinda ry’abakozi b’Umufatanyabikorwa Inshuti Mu Buzima (Partners In Health) n’abandi bari bahagarariye inzego n’abafatanyabikorwa bafite aho bahuriye n’urwego rw’ubuzima mu Karere.

Yababwiye ati:" Iyo umwana agwingiye adindira mu mikurire n’ubwenge. Umwana wagwingiye ntiyavamo Umuyobozi mwiza, ntiyavamo Umusirikare cyangwa Umupolisi mwiza, ntiyatsinda neza mu ishuri, ntiyavamo Umupilote mwiza. Kurinda umwana imirire mibi n’igwingira no kuvura umwana wagize icyo kibazo agakira bizatuma tugira abaturage bafite ubushobozi bw’umubiri n’ubwenge; bashoboye gukora, bakiteza imbere, bagateza imbere imiryango yabo n’Igihugu muri rusange."

Yagize kandi ati:"Kugwingira k’umwana bigira ingaruka mbi ku hazaza he, bidindiza iterambere ry’umuryango; kandi bidindiza iterambere ry’igihugu. Dufatanye, turinde abana imirire mibi; kandi igihe hagize umwana ugira icyo kibazo; akurikiranwe, gikemuke mu maguru mashya."

Umuyobozi w’Akarere yababwiye ko amakimbirane mu miryango, gusesagura umutungo w’umuryango, ihohorera ririmo iribera mu miryango, irikorerwa abana n’irishingiye ku gitsina, kutubahiriza uburenganzira bw’Umwana, ubusinzi, kwishora mu biyobyabwenge, isuku nkeya, kugaburira abana indyo ituzuye n’imyumvire ya bamwe mu baturage iri hasi bumva ko gutegura indyo yuzuye bisaba ubushobozi bwinshi; abasaba gufatanya gukumira ibyatera ibyo bibazo no kuzamura imyumvire y’abaturage ku bijyanye no kwirinda no kurwanya ikibazo cy’imirire mibi n’igwingira.

Yabasabye kandi gushyira imbaraga mu bukangurambaga ku kwita ku buzima bw’umubyeyi n’umwana mu minsi igihumbi bashishikariza abatwite kwipimisha inda inshuro umunani, gufata ibinini byongera amaraso ku batwite, kubyarira kwa muganga, gukingiza abana inkingo zose esheshatu, konsa abana kugera ku mezi atandatu nta kindi bavangiwe; nyuma yaho bakabaha inyunganirabere y’indyo yuzuye; bakabakangurira gushyira mu bikorwa andi mabwiriza n’ingamba bigamije gukumira no kurwanya ikibazo cy’imirire mibi n’igwingira by’abana bato.