Uyu munsi; Umuyobozi w'Akarere, Mukamana Soline; ari kumwe n’abandi bagize Komite Nyobozi y’Akarere yakiriye Ambasaderi wa Luxembourg mu Rwanda, Nyakubahwa Jeanne Crauser wasuye bimwe mu bikorwa byakozwe mu Karere ka Burera binyuze mu mushinga ufasha Uturere dukennye kurusha utundi (Pro-Poor Basket Fund) ushyirwa mu bikorwa ku nkunga y'icyo Gihugu cya Luxembourg.

Asura ibyo bikorwa, Nyakubahwa Ambasaderi Jeanne Crauser yari kumwe n'Umuyobozi Mukuru w’Ikigo gishinzwe guteza imbere ibikorwa by'iterambere mu Nzego z'Ibanze (LODA, Nyinawagaga Claudine n'Umunyamabanga Uhoraho muri Minisiteri y’Ibidukikije, Cyiza Béatrice.

Ibikorwa umushinga Pro-Poor Basket Fund wakoze mu Karere ka Burera harimo gusana imiyoboro y'amazi ya Nyirantarengwa, Bushoka-Nyanga, Nyabizi-Kagogo, Gakaranka na Mahongora-Kajerijeri no gusana ibyumba by'amashuri 56 ku bigo 19.

Nyakubahwa Jeanne Crauser yasuye ikigega cy'amazi n'ivomo byubatswe mu Kagari ka Ntaruka, mu Murenge wa Kinoni n’Ubukarabiro bw'intoki bwubakiwe Ecole Technique de Karuganda.

Mu ijambo rye ry’ishimwe, Umuyobozi w’Akarere yagize ati:"Ubuyobozi bw’Akarere ka Burera burashima Igihugu cya Luxembourg muberere Ambasaderi mu Rwanda ku ruhare rwacyo mu guteza imbere imibereho y’abaturage b'Akarere ka Burera binyuze mu bikorwa by'umushinga Pro-Poor Basket Fund."

Yagize kandi ati: "Ibi bikorwa by'iterambere byagezweho ni umusaruro w'imiyoborere myiza ya Nyakubahwa Perezida wa Repubulika, Paul Kagame ubanira neza u Rwanda bigatuma Abafatanyabikorwa biyongera bigateza imbere abaturage n'Igihugu muri rusange. Mumfashe tumushimire."

Umuyobozi w’Akarere yasabye abatuye Akarere ka Burera gufata neza ibikorwaremezo n’ibikorwa by’iterambere bubakirwa; bakirinda kubyangiriza; igihe babonye ababyangiriza cyangwa bamenye amakuru y’abafite umugambi wo kubyangiriza; bakihutira kubimenyesha inzego bireba.