Kimwe n'ahandi mu Gihugu; kuri uyu wa Kabiri Tariki 04/07/2022; mu Karere ka Burera hizihijwe umunsi mukuru wo kwibohora wizihijwe ku nshuro ya 28 ku Nsanganyamatsiko igira iti: "Kwibohora28; Isoko yo Kwigira"; abitabiriye ibi birori bakaba bakanguriwe guharanira kurushaho kwiteza imbere

Ibirori byo kwizihiza  uyu Munsi Mukuru ngarukamwaka byabereye mu Mirenge yose igize Akarere ka Burera. Ku rwego rw'Akarere wizihirijwe mu Murenge wa Cyanika ahatashye ku mugaragaro TVET Cyanika;aho Umuyobozi w'Akarere, Mme UWANYIRIGIRA Marie Chantal ari hamwe n'Abagize Inama y'Umutekano utaguye y'Akarere yakiriye Bwana KARAKE Ferdinand waje ahagarariye Guverineri w'Intara y'Amajyaruguru muri uyu muhango.

Ibindi bikorwa byatashwe uyu munsi mu rwego rwo kwishimira ibyagezweho mu Karere ka Burera mu Mwaka wa 2021-2022 harimo G+1 BUSHEMYA (Ishuri rigeretse rimwe) riherereye mu Murenge wa Gungwe aho Umuyobozi w’Akarere wungirije ushinzwe Iterambere ry’Ubukungu, Bwana NSHIMYIMANA Jean Baptiste yifatanyije n'Abayobozi mu zindi Nzego n'Abaturage kwizihiza uyu munsi; mu gihe  Umuyobozi w’Akarere wungirije ushinzwe Imibereho myiza y’Abaturage,Bwana MWANANGU Theophile yifatanyije n'izindi Nzego n'Abaturage gutaha ku mugaragaro Amashanyarazi mu Kagari ka Nyamicucu, Umurenge wa Butaro.

Mu butumwa Abayobozi b'Inzego zitandukanye bagejeje ku bitabiriye  umuhango wo kwizihiza uyu munsi mukuru wo kwibohora; bashimiye Umukuru w’Igihugu, Nyakubahwa Perezida wa Repubulika Paul KAGAME wayoboye Ingabo zari iza RPF/INKOTANYI mu rugamba rwo kubohora Igihugu no guhagarika Jenoside yakorewe Abatutsi mu 1994; babasaba gusigasira ibyagezweho no kubyaza umusaruro ibikorwa by'Iterambere begerejweho birimo Ibikorwaremezo birimo  Amashanyarazi,Amazi meza,Imiganda myiza n'Amashuri.

Mu ijambo Umuyobozi w’Akarere, Mme UWANYIRIGIRA Marie Chantal yagejeje ku bitabiriye ibirori byo kwizihiza uyu munsi mukuru wo kwibohora mu Murenge wa Cyanika yagize ati:"Kwizihiza umunsi mukuru wo kwibohora ku nshuro ya 28 bikwiriye kujyana no gusigasira ibyagezweho turwanya tukanakumira icyo ari cyo cyose cyabihungabanya; turwanya kwishora mu Biyobyabwenge; turwanya Magendu igira ingaruka ku Iterambere ry’Igihugu n’Abagituye; turwanya Ruswa, Amakimbirane n’ibindi byose binyuranyije n’Amategeko."

Yakanguriye Abaturage bitabiriye ibyo birori kwitabira gahunda za Leta zirimo kugira isuku umuco, gutangira ku gihe Ubwisungane mu kwivuza (MITUWELI); kwizigama muri Ejo Heza, kuboneza Urubyaro, kurwanya Imirire mibi n’Igwingira; bakanirinda gusibiza cyangwa gukura Abana mu Ishuri.

Mu butumwa bwe, Bwana KARAKE Ferdinand yasabye abitabiriye ibirori byo kwizihiza uyu munsi mukuru wo kwibohora  guharanira kurushaho gutera imbere babyaza umusaruro ibikorwa by’Iterambere Umukuru w’Igihugu yabagejejeho; bakanubahiriza gahunda za Leta zitandukanye zigamije kurushaho guteza imbere imibereho yabo n’Igihugu muri rusange.