Kuri uyu wa gatanu tariki 04 Nyakanga; mu Karere ka Burera hizihijwe umunsi mukuru wo kwibohora wizihijwe ku nshuro ya 31 ku insanganyamatsiko igira iti: " Kwibohora, Intambwe mu ntego"; abitabiriye ibyo birori basabwa gusigasira ibyagezweho; bagaharanira kandi kurushaho kwiteza imbere, kubumbatira no gusigasira umutekano.

Umuyobozi w'Akarere, Mukamana Soline, Umujyanama mu Nama Njyanama y’Akarere, Mukarutwaza Alphonsine wari uhagarariye Inama Njyanama y’Akarere n'abagize Inama y'Umutekano utaguye y'Akarere bifatanyije n’abaturage mu Murenge wa Rugengabali mu birori byo kwizihiza uyu munsi mukuru byabereye mu Kagari ka Nyanamo. Umuyobozi w’Akarere wungirije ushinzwe iterambere ry’ubukungu, Nshimyimana Jean Baptiste yifatanyije n’abaturage mu Murenge wa Gahunga mu birori byo kwizihiza uyu munsi mukuru byabereye mu Kagali ka Rwasa; naho Umuyobozi w’Akarere wungirije ushinzwe imibereho myiza y’abaturage, Mwanangu Théophile yifatanyije n’abaturage mu Murenge wa Nemba mu birori byo kuwizihiza byabereye mu Kagali ka Kivumu.

Mu ijambo rye, Umuyobozi w'Akarere yasabye abitabiriye ibyo birori kumufasha gushimira Nyakubahwa Paul Kagame, Perezida wa Repubulika y’u Rwanda; akaba n’Umugaba w’Ikirenga w’ingabo z’u Rwanda kuba izari Ingabo za RPA yari ayoboye zarabohoye Igihugu; zigahagarika Jenoside yakorewe Abatutsi mu 1994. 

Yashimye Ubuyobozi bwa Mine ya Gifurwe ku bufasha bunyuranye batanga bwunganira Akarere na gahunda za Leta muri rusange mu gukemuka ibibazo bibangamiye iterambere ry'imibereho y'abaturage; ndetse n'ibikorwa by'iterambere bubatse n'ibyo bateganya kubaka muri uwo Murenge bizarushaho guteza imbere imibereho y'abakora muri iyo Mine, abana babo, ndetse n'abayituriye. 

Yasabye kandi abitabiriye ibyo birori gusigasira ibyagezweho, kubumbatira umutekano, Ubumwe n'ubudaheranwa by'Abanyarwanda; bagakomeza kandi kwitabira gahunda za Leta zinyuranye zigamije imibereho myiza y'abaturage n'iterambere muri rusange zirimo kugira isuku umuco, gutangira ku gihe Ubwisungane mu kwivuza (Mituweli); kwizigama muri Ejo Heza, kuboneza Urubyaro, kurwanya imirire mibi n’igwingira ry’abana bato.

Yagize ati:"Dukwiriye kwigira no gufatira urugero ku bikorwa y’Ubwitange n’Ubutwari by’izahoze ari Ingabo za RPA zabohoye Igihugu (u Rwanda) bahagarika Jenoside yakorerwaga Abatutsi; bakabohora Abanyarwanda bari barabujijwe uburenganzira bunyuranye mu Gihugu cyabo kuko bamwe bari barahejejwe ishyanga barangiwe gutaha mu Rwababaye; Ubuyobozi bw’u Rwanda muri Repubulika ya mbere, iya kabiri ndetse n’igihe Jenoside yakorewe Abatutsi yabaga baragereranyaga u Rwanda nk’ikirahuri cyuzuye amazi ku buryo usutsemo andi amazi yameneka; bityo ko baguma mu Bihugu bahungiyemo kubera itotezwa no kubuzwa uburenganzira mu Gihugu cyabo mu bihe binyuranye."

Yakomeje agira ati:"Ibikorwa by’ubwitange ntagereranywa by’abari bagize RPA bari bayobowe na Nyakubahwa Perezida wa Repubulika, Paul Kagame bikwiriye kubera buri wese urugero rw’ubutwari bugamije ineza y’Igihugu n’abagituye akaba Bandebereho mu byo akora; akirinda; kandi akarwanya icyo ari cyo cyose cyabangamira iterambere y’Igihugu n’abagituye."

Umuyobozi w'Akarere yagize na none ati :"Gukunda Igihugu n’Abanyarwanda byabateye ubutwari bwo kwihanganira izuba ry’igikatu, imvura n’imbeho nyinshi byo mu Birunga, gutungwa n’inyica ntikize, bafata icyemezo cya gitwari cyo gusira imiryango n’ibyabo baza ku rugamba rwo kubohora Igihugu; abenshi barahagwa; abandi barahamugarira, abasigaye bakomeza gukotana kugeza bageze ku ntsinzi; babohora Igihugu, bahagarika Jenoside yakorerwaga Abatutsi."

Yagaragaje ko aho Abanyarwanda n’Abaturarwanda bageze; ndetse n’aho Igihugu kigeze uyu munsi mu iterambere ari umusaruro w’umuruho no kwitanga kutizigama byaranze abari bagize RPA; bityo ko uburyo bwiza bwo gushimira RPA n’Umukuru w’Igihugu, Nyakubahwa Paul Kagame wayoboye Urugamba rwo kubohora Igihugu ari ugusigasira ibyagezweho no gukomeza guharanira iterambere ry’Igihugu n’abagutuye