Mu kiganiro Umuyobozi w'Akarere, Mukamana Soline yagiranye n’abaturage b'Akagali ka Nyanamo, mu Murenge wa Rugengabali ku gicamunsi cy’uyu wa kabiri tariki 12 Gicurasi 2026 ubwo yari yabasuye muri gahunda ya DUHARI KU BWANYU ishimangira ihame ry'umuturage ku isonga yababwiye akamaro ko kwita ku buzima bw’umwana mu minsi 1,000 ibanza y’ubuzima bwe mu kumurinda igwingira.

Abasura, yari kumwe n'Umuyobozi w'Inkeragutabara mu Karere, Lt Col. Viateur Rudatinya n'Umuyobozi wa Polisi mu Karere, SP Nkurundundi Stanislas.

Yagize ati:"Kwita ku buzima bw'umwana mu minsi 1,000 ibanza y'ubuzima bwe; abatwite bakipimisha inda inshuro umunane, bakabyarira kwa Muganga, bagakingiza abana inkingo zose esheshatu, bakaboneza urubyaro, bagapimisha abana imikurire, bakonsa abana kugera ku mezi atandatu nta kindi babavangiye;nyuma yaho bakabaha inyunganiramirire igizwe n'indyo yuzuye, bakubahiriza n'ubundi burenganzira bw'abana biri mu byatuma dukumira, tunakarwanya imirire mibi n’igwingira ry’abana."

Yongeyeho ati:"Umwana witaweho uko bikwiye muri iyo minsi igihumbi akura neza haba mu gihagararo ndetse n’ibijyanye n’ubwenge. Kwita neza ku mwana ni ugutegura Abanyarwanda bafite ubushobozi bw’umubiri n’ubwenge bwo gukora; bakiteza imbere, bakagira n’uruhare mu iterambere ry’Igihugu. Iyi ikwiriye kuba intego ya buri mubyeyi n’umurezi."

Umuyobozi w'Akarere yakanguriye kandi ababyeyi kugira isuku umuco, bakirinda n'ibindi byatera imirire mibi n'igwingira ry'abana birimo amakimbirane mu miryango, ubuharike n'ubushoreke, kunywa ibiyobyabwenge n'ibinyobwa bitujuje ubuziranenge, ubusinzi n'ababyeyi batuzuza inshingano bafite ku bana.