Kuri uyu wa kane, mu Midugudu igize Akarere ka Burera habaye igikorwa cyo gupima abana imikurire kiba buri wa kane w'icyumweru cya gatatu cy'Ukwezi kigamije gukumira no kurwanya imirire mibi n'igwingira ry'abana. 

Umuyobozi w'Akarere, Mukamana Soline yakurikiranye uko iyi gahunda ishyirwa mu bikorwa mu Mudugudu wa Mfashe, mu Kagali ka Nyamabuye, Umurenge wa Kagogo.

Mu kiganiro yagiranye n’ababyeyi bitabiriye icyo gikorwa yababwiye ko kwita ku buzima bw'umwana mu minsi 1,000 ya mbere y'ubuzima bwe; abatwite bakipimisha inda inshuro umunane, bakabyarira kwa Muganga, bagakingiza abana inkingo zose esheshatu, bakabyarira kwa muganga, bakaboneza urubyaro, bagapimisha abana imikurire, bakonsa abana kugera ku mezi atandatu nta kindi babavangiye;nyuma y'icyo gihe bakabaha inyunganiramirire igizwe n'indyo yuzuye, bakubahiriza n'ubundi burenganzira bw'abana biri mu byatuma dukumira, tunakarwanya imirire mibi n’igwingira ry’abana.

Yagize ati:"Umwana witaweho uko bikwiye mu minsi 1,000 ya mbere y'ubuzima bwe akura neza; haba mu gihagararo ndetse n’ubwenge. Kwita neza ku mwana muri icyo ni ugutegura Abanyarwanda bafite ubushobozi bw’umubiri n’ubwenge bwo gukora; bakiteza imbere, bakagira n’uruhare mu iterambere ry’Igihugu. Iyi nshingano ikwiye kuba iya buri mubyeyi wese."

Yakanguriye kandi ababyeyi kugira isuku umuco, bakirinda n'ibindi byatera imirire mibi n'igwingira ry'abana birimo amakimbirane mu miryango, ubuharike n'ubushoreke, kunywa ibiyobyabwenge n'ibinyobwa bitujuje ubuziranenge, ubusinzi n'ababyeyi batuzuza inshingano bafite ku bana. Muri icyo gikorwa, ababyeyi bigishijwe uko bategura indyo yuzuye. 

Muri icyo gikorwa cyo gupima abana imikurire habayeho kandi kugaburira abana indyo yuzuye, kubaha amata no gusobanurira ababyeyi ifishi y’imikurire y’umwana.