Mu Karere ka Burera, kimwe n'abandi mu Guhugu hizihijwe Umunsi Mpuzamahanga wo kunywa Amata; uyu muhango wabereye ku Ishuri ribanza rya Gitovu riri mu Murenge wa Ruhunde; ahatanzwe Litiro 200 (100 z'Inshyushyu n'Ijana z'Ikivuguto) ku Bana magana atandatu (600).

Umuyobozi w’Akarere ka Burera wungirije ushinzwe Iterambere ry’Ubukungu, Bwana Munyaneza Joseph, Umunyamabanga Nshingwabikora wa Rwanda National Dairy Platform (RNDP), Mme Umurungi Florence MUSIIME n’uwari uhagarariye Ikigo cy’Igihugu gishinzwe gutera imbere Ubuhinzi n’Ubworozi(RAB), Bwana Dushimimana Jean de Dieu bafatanyije guha Abana Amata yatanzwe na Burera Dairy.

Mu ijambo yagejeje ku bitabiriye uwo muhango, Bwana Munyaneza yabasabye kumufasha gushima Umukuru w’Igihugu, Nyakubahwa Paul Kagame ku bwa gahunda nyinshi zigamije Imibereho myiza y’Abaturage harimo n’iyi yo guha Abana Amata.

Yakanguriye Ababyeyi n’Abarezi kwirinda imigirire ya bamwe bagurisha Amata yose bakamye, ntibagire na make basigira abagize Umuryango; akivuga kuri iyi ngingo yagize ati:"Kuyagurisha yose, cyangwa gusiga make ni ugushyira mu kaga ubuzima bw’abagize Umuryango." 

Umuyobozi w’Akarere wungirije ushinzwe Iterambere ry’Ubukungu  yagize kandi ati: "Byaba biteye agahinda kubona mu rugo rufite Inka ikamwa hagaragaye Imirire mibi n’Igwingira biturutse ku kugurisha Amata yose yakamye. Mbere yo gutekereza kugurisha Amata, banza uhaze abagize Umuryango."

Yasabye Ababyeyi, Abarezi ndetse n’Abanyeshuri gukomeza kubahiriza Amabwiriza yo kwirinda Icyorezo cya COVID-19; abibutsa ko nta ho kirajya; akangurira by’umwihariko Abarezi n’Ababyeyi guhora bibutsa Abana gukaraba Intoki neza n’Isabuni, guhana intera nibura metero imwe hagati y’Umuntu n’undi no kwambara Agapfukamunwa neza.  

Mu butumwa yatangiye kuri iryo Shuri rya Gitovu, Mme Umurungi yabanje kwifuriza abari aho guhorana Amata n’abanywa; ndetse ashima by’umwihariko Burera Dairy ku kuba yatanze Amata yahawe Abana kuri uyu Munsi Mpuzamahanga wo  gushishikariza abatuye Isi kunywa Amata.

Mme Umurungi yagize ati:"Kuba uyu munsi RNDP yahisemo kwizihiriza uyu Munsi Mpuzamahanga mu Karere ka Burera twashingiye ku mpamvu zirimo kuba muri aka Karere zikamwa; ngira ngo mwese mwabyiboneye ko Amata twahaye Abana atavuye ahandi. Yakamwe Inka zo muri aka Karere; atangwa na Burera Dairy. Burera muragahorana Inka n’Amata." 

Yagize kandi ati:"Urugo rurimo Inka; by’umwihariko Inka ikamwa ; ni umusingi wo kwirinda no kurwanya Imirire mibi n’Igwingira. Umuntu ugurisha Amata yose aba ahemukira abagize Umuryango we; kandi na we atisize." 

Bwana Dushimimana yashimye Inzego zagize uruhare mu itegurwa n’ishyirwa mu bikorwa ry’iyi gahunda yo guha Abana bo mu Karere ka  Burera Amata; aboneraho gusaba ko Umuco wo kunywa Amata utarangirana n’uyu Munsi Mpuzamahanga; ahubwo ko wakomeza; yibutsa ko  Umuntu unywa Amata agira Ubuzima bwiza.

Umwe mu Bana bahawe Amata yagize ati:"Mu izina ry’Abana bagenzi banjye twahawe Amata ndabashimira; ariko by’umwihariko ndashimira Perezida Paul Kagame ku  bw’iyi gahunda nziza. Azahorane Amata yo guha Abana n’Abakuru. Ndasaba Ababyeyi kujya baha Abana Amata. Biri mu bituma batsinda mu Ishuri."