Kimwe n'ahandi mu Gihugu; kuri uyu wa Gatandatu Tariki 27 Kanama uyu Mwaka; mu Karere ka Burera hakozwe umuganda rusange usoza Ukwezi kwa 08/2022 waranzwe n'ibikorwa birimo kubakira Imiryango itishoboye Amazu n'Ubwiherero.

Umuyobozi w'Akarere, Mme UWANYIRIGIRA Marie Chantal yakiriye mu Kagari ka Kidakama, Umurenge wa Gahunga Guverineri w'Intara y'Amajyaruguru, Mme NYIRARUGERO Dancille wari kumwe n'Umuyobozi wa Polisi muri iyi Ntara ,Chief Superintendent of Police (CSP) Francis MUHETO aho bifatanyije n'Abaturage mu muganda wahabereye wo kubakira Imiryango ibiri itishoboye Amazu.

Umuganda wajyaniranye no gusoza Icyumweru cy'Umujyanama mu Karere ka Burera gifite insanganyamatsiko igira iti:"Uruhare rw'Umuturage n'Umujyanama mu kubaka Burera twifuza. Muri iki Cyumweru Abajyanama bagiranye ibiganiro n'Abaturage babasobanurira uruhare rw'Umujyanama muri serivisi zihabwa Umuturage, uruhare rwe mu gukemura ibibazo bahura na byo n'Inzego zifite inshingano zo gukemura ibibazo byabo.

Abajyanama basobanuriye kandi Abaturage uruhare rw'Umujyanama mu kurwanya ruswa  n'akarengane n'uruhare rw'Umuturage mu bikorwa by'iterambere no gukemura ibibazo bibangamiye imibereho myiza ye.

Mu butumwa Guverineri, Mme NYIRARUGERO Dancille yabejeje ku Baturage bitabiriye umuganda wabereye mu Kagari ka Kidakama yabanje kubashimira kuba bitabiriye umuganda ku bwinshi bagafatanya kubakira Abaturanyi babo basenyewe n’Ibiza.

Yagize ati:"Umuganda rusange usoza Ukwezi ni imwe muri gahunda z’Igihugu zigamije gukemura ibibazo bibangamiye imibereho myiza y’Abaturage no guteza imbere Igihugu muri rusange. Gukora neza Umuganda no kwitabira izindi gahunda za Leta ni ugufasha Umukuru w’Igihugu kugera ku migambi ye yo guteza imbere Abaturage n’Igihugu muri rusange. Mumfashe tumushimire ku bwiza n’iterambere amaze kugeza ku Gihugu n’Abaturage."

Guverineri, Mme NYIRARUGERO Dancille yasabye Abaturage kurwanya imirire mibi n’Igwingira bategura Indyo yuzuye, kwirinda Ibiyobyabwenge, Magendu, kwirinda gukura Abana mu Ishuri cyangwa kuribasibya,kurwanya isuri  bakora ibikorwa birimo gukora Amaterasi no gucukura Ibyobo bifata amazi mu Mirima yabo; kwirinda Amakimbirane mu Miryango; kugira isuku umuco; kandi bakitabira n’izindi gahunda za Leta zirimo gutanga Mituweli ku gihe,kuboneza urubyaro hagamijwe kubyara abo bashoboye kurera; anabasaba kugira uruhare mu gusigasira umutekano bakora neza amarondo.

Mu magambo yuje  ibyishimo byinshi; umwe mu bubakiwe wo mu Kagari ka Kidakama  witwa MUKARUSAGARA Esperance yagize ati: "Nabaga mu Nzu itameze neza. He no kongera kuvirwa.Iyi Nzu nubakiwe nyikesha imiyoborere myiza y'Umukuru w'Igihugu,Nyakubahwa Paul KAGAME . Ndamushimira cyane.Imana izamunyiturire."

Umuyobozi w’Akarere wungirije ushinzwe iterambere ry’Ubukungu,Bwana NSHIMYIMANA Jean Baptiste yifatanyije n'Abaturage mu muganda wabereye mu Kagari ka Kabona,Umurenge wa Rusarabuye n'abo mu Kagari ka Mubuga, Umurenge wa Butaro; naho Umuyobozi w’Akarere wungirije ushinzwe imibereho myiza y’Abaturage, Bwana MWANANGU Theophile yifatanyije n'Abaturage mu muganda wabereye mu Kagari ka Gacundura,Umurenge wa Rwerere.