Kuri uyu wa mbere tariki 24 Mata uyu Mwaka; Minisitiri wa Minisiteri y'Urubyiruko, Hon. Abdallah UTUMATWISHIMA yasabye Urubyiruko rwo mu Karere ka Burera kubyaza umusaruro amahirwe y’iterambere agaragara mu Karere ndetse n’agaragara ahandi mu Gihugu.

Ubu butumwa yabutanze mu ruzinduko rw’Akazi yagiriye mu Karere ka Burera uyu munsi aho yagiranye ibiganiro n'Urubyiruko; anasura ibikorwa byarwo bitandukanye bibarizwa mu Karere.

Muri uru ruzinduko; Minisitiri Abdallah UTUMATWISHIMA yari hamwe n'Umunyamabanga Uhoraho muri iyi Minisiteri, Parfait BUSABIZWA n'Umuyobozi Mukuru muri iyi Minisiteri ushinzwe guteza imbere ubushobozi bw'Urubyiruko, Solange TETERO.

Aba Bashyitsi bakiriwe n’Umuyobozi w'Akarere, Mme UWANYIRIGIRA Marie Chantal; ari hamwe n'abagize Komite Nyobozi, abagize Inama y'umutekano itaguye y'Akarere n'Abayobozi b'izindi Nzego mu Karere.

Ku ikubitiro; Minisitiri w'Urubyiruko yakoranye inama n'abagize Komite Nyobozi, abagize Inama y'Umutekano itaguye y'Akarere n'abahagarariye izindi Nzego mu Karere yabereye ku Biro by'Umurenge wa Rugarama aho bunguranye ibitekerezo ku ngamba zo kurushaho guteza imbere Urubyiruko mu Karere; anagaragariza uru Rubyiruko amahirwe rwabyaza umusaruro rikiteza imbere; rukanagira uruhare mu iterambere ry’Igihugu muri rusange.

Mu ijambo Minisitiri Abdallah UTUMATWISHIMA yagejeje kuri urwo Rubyiruko rwari ruhagarariye urundi; yarubwiye ati: "Mukwiriye kubyaza umusaruro amahirwe y'iterambere agaragara mu Ikoranabuhanga, Ubukerarugendo, Ubuhinzi n'Ubworozi; ndetse n’ibindi byiciro;  kandi mubyaze umusaruro ibikorwa by’iterambere  bibegerezwa birimo Amashanyarazi."

Muri uru ruzinduko; Minisitiri w'Urubyiruko yasuye BURERA YOUTH COMMUNITY aganira n'Ubuyobozi bw’iyi Kampani y’Urubyiruko rutanga serivisi zirimo izijyanye n’Ubukerarugendo bushingiye ku gusigasira umuco.

Minisitiri wa Minisiteri y'Urubyiruko yasuye kandi umwe mu Rubyiruko witwa Fraterne MANISHIMWE ufite Site y'Ubukerarugendo yise FRAMA ADVENTURES iherereye ku Kirwa cya BIRWA I, mu Murenge wa Kinoni; amugira inama y’ibyo yakora kugira ngo ibikorwa bye birusheho gutera imbere.

Yasuye kandi New Bugarama Mining Ltd , mu Murenge wa Kagogo; aganira n'Urubyiruko rukora muri iki Kirombe; arukangurira kwizigama no kwirinda imyitwarire mibi aho iva ikagera.

Na none kandi; Minisitiri Abdallah UTUMATWISHIMA yasuye imwe muri Kampani z'Urubyiruko rwita ku mihanda rukorera mu Murenge wa Kinyababa. Ku gicamunsi; yasuye Ikigo cy’Urubyiruko cy’Akarere ka Burera kibarizwa mu Murenge wa Bungwe.