Kuri uyu wa gatanu, mu Karere ka Burera hatangiye amarushanwa Umurenge Kagame Cup 2024-2025 yateguwe ku insanganyamatsiko igira iti: "Twimakaze imiyoborere myiza duharanira ko umuturage aba ku isonga". 

Muri aya marushanwa, buri Murenge mu Mirenge 17 igize Akarere ka Burera uhagarariwe n'amakipe abiri (ikipe y'Abagabo n'iy'abagore).

Umuyobozi w'Akarere, Mukamana Soline yakurikiye imikino yahuje amakipe y'Imirenge ya Butaro na Rwerere yabereye mu Kagari ka Rusumo, mu Murenge wa Butaro, Umuyobozi w'Akarere wungirije ushinzwe iterambere ry’ubukungu, Nshimyimana Jean Baptiste yakurikiye imikino yahuje amakipe y'Imirenge ya Cyeru na Rusarabuye yabereye mu Kagari ka Butare , mu Murenge wa Cyeru; naho Umuyobozi w'Akarere wungirije ushinzwe imibereho myiza y’abaturage, Mwanangu Théophile yakurikiye imikino yahuje amakipe y'Imirenge ya Cyanika na Rugarama yabereye mu Kagari ka Kabyiniro, mu Murenge wa Cyanika. 

Mu kiganiro bagiranye n'abitabiriye imikino babasobanuriye intego y'aya marushanwa, babashimira kuba bayitabiriye ku bwinshi; babasaba gukunda no gukora siporo; kandi bakayikundisha abandi. 

Avuga ku kamaro ko gukora siporo, Umuyobozi w'Akarere yabwiye abitabiriye imikino yahuje Umurenge wa Butaro na Rwerere ati:" Nimwumva abantu bavuga ngo siporo ni ubuzima baba bavuga ukuri kubera ko bimurinda indwara nyinshi; bityo akiteza imbere bitewe n’uko afite ubuzima buzira umuze."

Bakanguriye abitabiriye imikino kwitabira gahunda za Leta zigamije imibereho myiza n'iterambere muri rusange harimo Ejo Heza, isuku n'isukura, kwitabira umurimo no kuwunoza hagamijwe kwiteza imbere, kwirinda no kugira uruhare mu kurwanya ibiyobyabwenge, ubusinzi, imirire mibi n'igwingira, inda ziterwa abangavu n’icyahungabanya gahunda ya Ndi Umunyarwanda.

Abagize Komite Nyobozi baganirije kandi urubyiruko ku buzima bw'imyororokere, babagira inama yo kwirinda ibishuko n’imyitwarire mibi yabangamira ahazaza habo heza.