Kuri uyu wa gatatu tariki 13 Werurwe uyu mwaka; mu Karere ka Burera hatangijwe icyumweru cyahariwe ubukangurambaga ku mirire, imikurire, isuku n'isukura n'umutekano bufite insanganyamatsiko igira iti:"Hehe n'igwingira".

Ku rwego rw'Akarere, gutangiza ku mugaragaro ubu bukangurambaga byabereye mu Murenge wa Kinyababa ; aho Umuyobozi w'Akarere, MUKAMANA Soline, ari kumwe n’Umuyobozi w’Akarere wungirije ushinzwe imibereho myiza y’abaturage, MWANANGU Theophile yakiriye umuyobozi mukuru w’Ikigo cy’Igihugu gishinzwe imikurire no kurengera umwana,INGABIRE Assumpta wifatanyije n'Ubuyobozi bw’Akarere ka Burera gutangiriza ubu bukangurambaga.

Mu byakozwe uyu munsi harimo gusura Ikigo mbonezamirire ku kigo nderabuzima cya Rugarama, mu Murenge wa Rugarama; kubaka akarima k'igikoni mu Kagari ka Rutovu, mu Murenge wa Kinyababa, kumurika ibikorwa by'ingo mbonezamikurire, kwigisha ababyeyi uko bategura indyo yuzuye, kugaburira abana amata n'indyo yuzuye n’ibiganiro ku buzima bw'umubyeyi n'umwana no kurwanya imirire mibi n’igwingira.

Umuhango wo gutangiza ku rwego rw’Akarere ubu bukangurambaga witabiriwe n’Umuyobozi  wungirije wa Gikuriro kuri Bose, Umuyobozi wa Porogaramu y'ubuvuzi mu Inshuti mu Buzima (Partners In Health), Umuyobozi wungirije w'Ibitaro bya Butaro, uhagarariye umushinga PRISM, uhagarariye World Vision, uhagarariye Polisi, uhagarariye Ingabo, abakozi ba Caritas Rwanda,uhagarariye Compassion international n’abakozi bo mu ishami ry’ubuzima.

Mu bikorwa biteganyijwe gukorwa muri iki cyumweru cy’ubukangurambaga harimo gutanga serivisi zo gukurikirana imikurire y'abana bato,kwigisha ababyeyi gutegurira abana indyo yuzuye, ibikorwa by'isuku n'isukura no gusobanurira ababyeyi ndetse n'abandi uburenganzira bw'umwana hagamijwe kumurinda ihohoterwa

Mu ijambo rye, Umuyobozi w'Akarere, MUKAMANA Soline yagize ati:"Dukwiye kurwanya imirire mibi n’igwingira twifashishije ibyo tweza ndetse n’ibiboneka aho dutuye.Dukwiye kandi kurangwa n’isuku ku mubiri, ku myambaro, aho dutuye, aho dukorera ndetse naho tugenda. Isuku ikwiye kuturanga kandi igihe dutegura ibyokurya n’ibinyobwa, ndetse n’igihe cyo konsa. Muri make; turasabwa kugira isuku umuco."

Yakanguriye kandi ababyeyi kujya bipimisha inda inshuro umunane; kandi bakubahiriza gahunda y’iminsi igihumbi yo kwita ku mwana.