Kuri uyu wa mbere tariki 12 Mutarama 2026, mu Mirenge igize Akarere ka Burera hatangijwe ubukangurambaga bugamije guteza imbere umuco w'isuku n'isukura mu mashuri bwateguwe na Minisiteri y'Uburezi ku insanganyamatsiko igira iti: #FresheKuIshuri buzageza mu mpera z'Igihembwe cya II cy'umwaka w'amashuri wa 2025-2026.

 Atangiza ubwo bukangurambaga mu Kagari ka Kagitega, mu Murenge wa Cyanika ahahuriye abanyeshuri bagera ku 7,000 bo mu bigo byo muri uwo Murenge bari kumwe n'abarezi babo, Umuyobozi w'Akarere, Mukamana Soline yakanguriye abanyeshuri n'abandi bitabiriye icyo gikorwa kwambara buri gihe umyenda imeshe n'inkweto zifite isuku, koga umubiri wose buri munsi, guca inzara, kwiyogoshesha umusatsi, koza neza mu kanwa bakoreshe amazi meza n'umuti w'amenyo wabugenewe, kurangwa n'isuku aho batuye, aho bakorera n'aho bagenda; muri make isuku bakayigira umuco.

Yasabye abayobozi b'Ibigo by'Amashuri kwita ku isuku y'abanyeshuri, isuku y'amafunguro n'ibinyobwa bafata ku ishuri, isuku y'aho bigira, isuku y'ubwiherero, isuku y'aho abanyeshuri barara; isuku ikaba ntamakemwa mu bigo bayobora.

Yagaragaje ingaruka zo kutagira isuku ihagije agira ati:"Umwanda utera indwara zinyuranye zirimo inzoka zo mu nda, impiswi, uruheri n’ibyorezo birimo Korera. Isuku nkeya idindiza iterambere kubera ko uwarwaye adakora; kandi kugira ngo akire yivuza atanze amafaranga yakabaye akoreshwa ibindi bimuteza imbere."

Yabwiye abitabiriye icyo gikorwa ko hari ndetse n’abahitanwa n’indwara zinyuranye ziterwa n’umwanda; abasaba kurangwa n’isuku ahantu hose; kandi bakita ku isuku y’ahantu hagendwa n’ahahurira abantu benshi harimo amasoko, imihanda, inzira z’imigenderano, santere z’ubucuruzi n’ibigo bya Leta n’iby’abigenga birimo amashuri n’amavuriro.