Kuri uyu wa mbere tariki 03 Kamena uyu mwaka, mu Karere ka Burera hatangirijwe ku rwego rw'Igihugu icyumweru cyahariwe ubukangurambaga ku kwita ku buzima bw'umubyeyi n'umwana bufite insanganyamatsiko igira iti :" Hehe n’igwingira: Twite ku buzima bw'umubyeyi utwite n'umwana, imirire n'isuku, dukingize abana inkingo zose."

Umushyitsi Mukuru muri iki gikorwa yari Minisitiri w’Uburinganire n’iterambere ry’Umuryango, Dr Valentine UWAMARIYA. Iki gikorwa kitabiriwe n'Umuyobozi Mukuru w’Ikigo cy’Igihugu gishinzwe imikurire no kurengera umwana, Mme INGABIRE Assumpta, Umuyobozi Mukuru w’Ikigo cy’Igihugu gishinzwe ubuzima, Prof. Claude Mambo Muvunyi n'abafatanyabikorwa barimo Umuyobozi w’Ishami ry’Umuryango w’Abibumbye rishinzwe ubuzima; ishami ry’u Rwanda, Dr Theopista KABUTENI n'Umuyobozi wa World Vision; Ishami ry’u Rwanda, OKUMU Pauline.

Abayobozi n'abafatanyabikorwa bitabiriye iki gikorwa bakiriwe n'Umuyobozi w'Akarere, MUKAMANA Soline, wari kumwe n’Umuyobozi w’Inkeragutabara mu Karere, Lt Col Fred NYIRINKWAYA, Umuyobozi wa Polisi mu Karere, SSP Aphrodis NKUNDINEZA, Umuyobozi w’Urwego rw’Ubugenzacyaha mu Karere, Isaac RWEMA n’Umunyamabanga Nshingwabikorwa w’Akarere, James KARANGWA.

Mu butumwa bw’abayobozi bitabiriye iki gikorwa bagarutse ku bimaze kugerwaho mu kugabanya igwingira ry’abana batoya n’ingamba mu gufatanya guca burundu iki kibazo cy’igwingira ry’abana batoya.

Abayobozi bitabiriye iki gikorwa cy’ubukangurambaga bakanguriye abaturage bitabiriye iki gikorwa kwipimisha inda inshuro umunane no kwita ku kamaro k’imirire myiza y’umwana mu minsi igihumbi, kwita ku isuku, gukingiza abana inkingo zose, gufata ikinini cy’inzoka zo mu nda na bilariziyoze, kuboneza urubyaro no kwitabira ingo mbonezamikurire.

Abayobozi bitabiriye iki gikorwa bakanguriye abagabo kugira uruhare mu mikurire y’abana. Gutangiza icyumweru cyahariwe kwita ku buzima bw'umubyeyi utwite n'umwana bwabereye mu Mirenge yose igize Akarere.

Mu ijambo rye,Umuyobozi w’Akarere, MUKAMANA Soline yabwiye abitabiriye iki gikorwa agira ati: "Dufite ikibazo cy’abagikoresha ibiyobyabwenge birimo Kanyanga biteza amakimbirane mu miryango. Umuryango urimo amakimbirane; umwana ntaba acyitaweho, arasiganirwa; ndetse n’amafaranga abonetse akigira muri ibyo biyobyabwenge aho kuyakoresha bita ku bana".

Yagize kandi ati: "Twashyize imbaraga mu mutekano; aho muri buri Murenge; cyane iyegereye umupaka, kuko ari ho iki kibazo cyiganje, twahashyize imboni z’umutekano, dushyira n’imbaraga mu marondo kugira ngo badufashe gukumira ibyo biyobyabwenge byinjizwa mu Gihugu."

Mu butumwa bwe, Minisitiri w’uburinganire n’iterambere ry’umuryango, Dr Uwamariya Valentine yasabye ababyeyi gufatanya kwita ku buzima bw’umwana aho kubiharira umwe gusa, ndetse anabasaba kureka ubusinzi no kumarira mu biyobyabwenge amafaranga ava mu musaruro wabo, aho kuyakoresha bita ku bana.

Yagize kandi ati:" Bamwe mu baturage bamarira amafaranga mu biyobyabwenge aho kuyakoresha bita ku bana n’iterambere ry’umuryango muri rysange; bikaba biri mu bitera igwingira ry’abana batoya. Ababyeyi bakwiriye gufatanya mu nshingano; haba kubarera no kwita ku mirire yabo n’imikurire."