Uyu munsi, mu Karere ka Burera hizihijwe Umunsi Mpuzamahanga w'Umugore wo mu cyaro wizihijwe ku nshuro ya 28 ku nsanganyamatsiko igira iti:"Umugore ni uw'agaciro”.

Umuyobozi w'Akarere, Mukamana Soline, Umuhuzabikorwa w’Inama y’Igihugu y’abagore mu Karere, Uwamwiza Catherine n'abandi Bayobozi mu Karere bifatanyije n'abaturage b'Akagari ka Rwasa, mu Murenge wa Gahunga mu birori byo kwizihiza uyu munsi mukuru byabereye mu Mudugudu wa Kabanga.

Mu ijambo rye, Umuyobozi w’Akarere yakanguriye abagore guharanira iyubahirizwa ry'uburenganzira bwabo n'ihame ry'uburinganire, kurwanya ihohotera ririmo irishingiye ku gitsina, kwitabira kwaka inguzanyo mu bigo by'imari no guharanira kujya mu nzego z'ubuyobozi zinyuranye.

Yakanguriye abatuye Akarere ka Burera muri rusange guharanira ko imiryango yabo iba imiryango itekanye, kandi iteye imbere; imiryango itarangwamo amakimbirane n'ubusinzi, ijya inama ku micungire n'imikoreshereze y'umutungo; imiryango yita ku burere n'uburezi bw'abana. 

Yagize ati:"Uyu munsi ni umwanya w’ingenzi wo kuzirikana uruhare rukomeye rw’umugore wo mu cyaro mu iterambere ry’Igihugu cyacu. Umugore wo mu cyaro ni umutima w’urugo, ni we ufasha mu kubaka ubukungu bw’umuryango binyuze mu buhinzi, mu bworozi n’ibikorwa by’iterambere binyuranye; ariko akenshi ahura n’imbogamizi zinyuranye zirimo ubushobozi buke, imyumvire ikiri hasi n’ihungabana ry’uburenganzira bwe."

Umuyobozi w’Akarere yagize kandi ati:" Akarere ka Burera, twiyemeje gushyira imbere gahunda zigamije guteza imbere umugore binyuze mu mishinga y’ubuhinzi n’ubworozi, gahunda zo kwizigamira, gahunda z’imibereho myiza n’ubukangurambaga ku burenganzira bw’umugore. Turashaka ko buri mugore agira ijambo mu rugo no mu iterambere ry’Igihugu. Twiyemeje kandi gukomeza guteza imbere uburinganire n’ubwuzuzanye kugira ngo hatagira umuturage usigaye inyuma."

Yagize na none ati:"Nsoje nibutsa amagambo ya Nyakubahwa Perezida wa Repubulika y’u Rwanda, Paul Kagame yavuze ubwo yari mu Nteko Rusange ya 63 y’Umuryango w’Abibumbye i New York ku wa 23 Nzeri 2008 ahi yagize ati “Uburinganire si ikibazo kireba abakobwa n’abagore gusa, ahubwo ni inshingano ya buri wese kuko uburinganire no kongerera ubushobozi abagore ni umusingi wo kurwanya ubukene no kwiteza imbere birambye".

Mu byaranze ibyo birori harimo koroza imwe mu miryango itishoboye; ikaba yahawe Inka; gushyikiriza imwe mu miryango Matela, guha ibiribwa by'ubwoko bunyuranye imwe mu miryango ifite amikoro make, indi ihabwa ibikoresho byo kubikamo amazi. Muri ibyo birori kandi, bamwe mu bagore biteje imbere bamuritse ibyo bakora; batanga kandi ubuhamya bw’aho bahereye n’aho bageze mu iterambere