Kuri uyu wa mbere, ku biro by'Akarere bahereye inama mpuzabikorwa y'Akarere yayobowe n’Umuyobozi wako, Mukamana Soline; ikaba yitabiriwe n'Abayobozi barimo Umuyobozi w'Ingabo za 305 Bde, Col Safari Alphonse, Umuyobozi w'Inkeragutabara mu Ntara y'Amajyaruguru, Lt Col Kamali Charles, Perezida w'Inama Njyanama y'Akarere, Bizimungu Jean Baptiste.

Abandi bayitabiriye harimo abagize Komite Nyobozi y'Akarere, abagize Inama Njyanama y’Akarere, Inama y'umutekano itaguye y'Akarere na Perezida w’Ihuriro ry’Abafatanyabikorwa b’Akarere, Muhorana Edouard.

Muri iyo nama hatanzwe ibiganiro ku ruhare rw’Imihigo mu ikwihutisha gahunda y’igihugu yo kwihutisha iterambere, kurwanya imirire mibi, isuku n’isukura, ingamba zo kurwanya no gukumira ibiza, gukemura ibibazo bibangamiye imibereho myiza y'abaturage, uruhare rw'Abafatanyabikorwa mu kwihutisha gahunda cy'Igihugu y’Iterambere rirambye (NST2) n'imitangire ya serivisi.

Mu ijambo rye, Umuyobozi w'Akarere yashimye Abayobozi bitabiriye inama n'inama batanze ku iterambere ry'Akarere n'abagatuye; asaba abakozi n’ibyiciro byatowe n’abandi bitabiriye inama guharanira kuba Indashyikirwa mu byo bashinzwe.

Yagize ati:"Abayobozi b’inzego zinyuranye mu Karere n’abafatanyabikorwa turusheho gufatanya, dusenyere umugozi umwe; dukemure ibibazo bibangamiye imibereho myiza y’abaturage; binadindiza iterambere muri rusange birimo imirire mibi n’igwingira ry’abana bato, ibikorwa byo kwishora mu biyobyabwenge, amakimbirane, ubusinzi no kutitabira umurimo. Dufatanye gukemura ibyo bibazo ndetse n’ibindi ntarondoye."

Umuyobozi w'Akarere yagize kandi ati:"Ndashimira Abafatanyabikorwa ku ruhare bagira mu iterambere ry'Akarere n'abagatuye. Ndabasaba kwagura no kongera ibikorwa byabo bikagera mu Karere hose; kandi ku bantu benshi; bityo turusheho gufatanya guteza imbere imibereho y’abaturage n’Akarere muri rusange."

Yasabye Abayobozi bitabiriye inama  gukorera hamwe no gufatanya gukemuka ibibazo bibangamiye imibereho myiza y'abaturage, guha abaturage serivisi nziza, kubumbatira no gusigasira umutekano, gusigasira ibyagezweho no gushyira mu bikorwa Imihigo n'izindi gahunda za Leta zinyuranye zirimo isuku n'isukura, EjoHeza, Mituweli, kurwanya imirire mibi n'igwingira ry'abana bato no gufasha abaturage kwivana mu bukene.