Mu ijambo rye ry’ikaze ku bashyitsi bitabiriye igikorwa cyabereye mu Murenge wa Rusarabuye ku wa gatanu tariki 26 z’uku Kwezi cyo kwibuka abazize Jenoside yakorewe Abatutsi bashyinguye mu rwibutso rwa Jenoside yakorewe Abatutsi ruri muri uyu Murenge, Umuyobozi w’Akarere, Mukamana Soline yibukije abakitabiriye ko Ndi Umunyarwanda ari isano muzi ihuza Abanyarwanda; bityo ko dukwiriye kuyisigasira twirinda; kandi turwanya icyabangamira ubumwe n’ubudaheranwa by’Abanyarwanda.

Yagize ati:" Muri iki gihe twibuka ku nshuro ya 31 Jenoside yakorewe Abatutsi; ndasaba abaturage b’Akarere ka Burera gukomeza gufata mu mugongo abarokotse Jenoside yakorewe Abatutsi; kandi dukomeze kwirinda; tunafatanye kurwanya ikintu cyose cyabangamira gahunda ya Ndi Umunyarwanda, tuzirikana ko ari ishingiro ry’ubumwe, umutekano n’iterambere birambye."

Yasabye abitabiriye icyo gikorwa kumufasha gushima izari Ingabo za RPA/INKOTANYI zari ziyobowe na Perezida wa Repubulika, Nyakubahwa Paul Kagame zahagaritse Jenoside yakorewe Abatutsi; bityo bagakomeza gusigasira no kubungabunga ibikorwa by’iterambere Igihugu kimaze kugeraho.

Mu byaranze iki gikorwa harimo gushyira indabo aho ku Rwibutso mu rwego kwibuka no guha icyubahiro abazize Jenoside yakorewe Abatutsi bahashyinguye, ubuhamya bwa Kabanyana Pélagie warokotse Jenoside wabwiye abitabiriye icyo gikorwa uburyo yarashwe n'Interahamwe; agakomereka bikomeye cyane hafi yo gupfa ariko Inkotanyi zikamugeraho atarashiramo umwuka zikamurokora, aboneyeho kuzishimira avuga ko kuba ariho ari zo abikesha.