Kuri uyu wa kane, Umunyamabanga Nhingwabikorwa w’Umurenge wa Cyeru, Mugiraneza Ignace yakiriye ushinzwe inozamikoranire ya Polisi n’izindi Nzego ndetse n’abaturage mu Karere ka Burera, Assistant Inspector of Police (AIP) Niyibizi Laurent bafatanya guhugura abagize Komite zishinzwe gukurikirana uruhare ry'abaturage mu gucunga umutekano (Community Policing Committees) bo muri uwo Murenge.

Babahuguye ku byerekeye inshingano zabo zirimo uruhare rw’abaturage mu gukumira no kurwanya ibyaha birimo ibikorwa byo kwishora mu biyobyabwenge birimo Kanyanga n’Urumogi.

Mugiraneza yababwiye ati:"Igihe muganira n’abavandimwe n’abaturanyi banyu ntimukabure kubabwira ingaruka zo gutunda, gukwirakwiza, gucuruza, kunywa no gukoresha ibiyobyabwenge; mubabwire ko bitera umutekano muke n’amakimbirane mu miryango, ubukene no gukora ibyaha binyuranye biviramo bamwe gufungwa. 

Yagize kandi ati:"Mujye mubibutsa ko iyo umuntu afunzwe azira kwishora mu biyobyabwenge cyangwa gukora ibindi bitemewe n’amategeko bitamugiraho ingaruka wenyine; ahubwo ko bidindiza iterambere ry’umuryango we kubera ko iyo afunzwe aba adakora; ahubwo ko abagize umuryango bibatwara igihe ndetse n’amafaranga bakoresha bajya kumusura aho afungiwe; mubagire inama yo kwirinda ikintu cyose kitemewe n’amategeko."

Yababwiye kandi ati:"Mujye mubabwira kandi ingaruka z’amakimbirane; mubasobanurire ko atera ubukene, ukutumvikana, ukudashyira hamwe no kutajya inama hagati y’abagize umuryango; mubereke ko bidindiza iterambere ry’umuryango; kandi ko biri mu bitera abana kureka ishuri; bamwe mu bana bagahitamo guhunga imibereho mibi n’umutekano muke biri iwabo; bakajya kwibera ku muhanda cyangwa gukora imirimo ibavunnye kugira ngo babone amaramuko; mubagire inama yo kwirinda icyo ari cyo cyose cyaba intandaro y’amakimbirane.

AIP Niyibizi yabasabye kujya bakangurira n’abavandimwe n’abaturanyi banyu kwirinda magendu; babagaragariza ko igira ingaruka ku iterambere ry’Igihugu kubera ko abayikora baba batatanze imisoro; babagire kandi inama yo kureka kwambuka umupaka bitubahirije amategeko; igihe bashaka kujya hanze y’Igihugu bakanyura ku mipaka yemewe.

Yagize ati:"Mujye mubabwira ko abanywa ibiyobyabwenge bakora ibikorwa biteza umutekano muke birimo gukubita no gukomeretsa, ubujura, ihohotera ry’uburyo bunyuranye no gufata ku ngufu; kandi ko babiterwa n’uko baba bataye ubwenge; ko bakora ibyo batatekerejeho na mba; mubagire inama yo kwirinda ibiyobyabwenge aho biva bikagera."

Yababwiye ko umwigisha mwiza ari utanga urugero rwiza; aboneraho kubasaba kuba intangarugero n’indakemwa kuko ari bwo ibyo bigisha bizashyirwa mu bikorwa.

Komite zo kubungabunga umutekano (CPCs) zashyizweho n’Iteka rya Minisitiri N° 02/07 ryo mu 2007.