Umushinga ushinzwe guteza imbere Inka zitanga Umukamo (Rwanda Dairy Development Project (RDDP), kuri uyu wa gatatu tariki 3 Werurwe wahembye Amatsinda atanu (05) y’Aborozi y’Indashyikirwa agizwe n’Abanyamuryango 150; aya akaba azwi nk’Ishuri ry’Aborozi mu Murima, mu Kiraro no mu Rwuri (Livestock Farmer Field School (L- FFS) n’Abafashamyumvire batanu (05) bayakurikiranira hafi.

Ibikoresho uyu mushinga watanze bifite agaciro k’Amafaranga y’u Rwanda Miliyoni eshanu n’Ibihumbi Magana inane na mirongo inane na bitanu (5,885,000 Frws); bikaba bigizwe n’Amapompo 17, Litiro 17 z’Umuti wica Uburondwe,Ingorofani 12,Ibitiyo 20,Karendali z’ubuhinzi 15, Udukoresho dupima Ifumbi 22, Udukoresho dukoreshwa mu kuzinga Ubwatsi 10, Ibipimo bifata Umuriro 15, Metero zipima Ibiro 15, Bote 95, Imipira yo kwambara 94 n’Ingofero 99.

Umuyobozi w’Akarere ka Burera wungirije ushinzwe Iterambere ry’Ubukungu, Bwana Munyaneza Joseph ni we wabashyikirije ibi bikoresho afatanyije n’Umuhuzabikorwa wa RDDP mu Karere ka Burera, Bwana Nizeymana Fabien.

Iki gikorwa cyo guhemba Amatsinda ya L-FSS n’Abafashamyumvire bayo kizakomereza mu yindi mirenge y’Akarere ka Burera.

Bwana Munyaneza yashimye Ubuyobozi bw’Umushinga RDDP ku bihembo by’Ibikoresho bahaye aya matsinda n’Abafashamyumvire bayo. Yababwiye ati:"Kubaha ibi bihembo bigaragaza ko hari icyo mukora aho mutuye. Ibikoresho muhawe muzabibyaze umusaruro, mugire Inka nziza, munafashe Abaturanyi banyu korora mu buryo bwiza bugezweho."

Yabasabye kandi gufasha Abaturanyi babo kubaka Imirima y’Igikoni, kubakangurira kwirinda amakimbirane, kubakangurira kwirinda gukura Abana mu Ishuri; abarivuyemo bakaribasubizamo, bakabigisha uburyo bagutegura Indyo nziza; bakanabakangurira kwirinda Ibiyobyabwenge."

Bwana Nizeyimana yasabye abahawe Ibihembo gukomeza kuba Intangarugero; ibi bikajyana no gusangiza Abaturanyi babo Ubumenyi bafite mu bijyanye n’Ubworozi.

Abahawe Ibihembo bagaragaje ibyishimo. Umwe mu Bafashamyumvire witwa Mukamusana Jeanne d’Arc wo mu murenge wa Cyeru yagize ati:"Bote nahawe zizandinda kwicwa n’Amahwa, Ipompo Itsinda nkuriye ryahawe izadufasha gutera inka umuti ku gihe; kandi nzajya nyifashisha mu kwigisha abandi uburyo bwiza bwo gutera Inka umuti wica Uburondwe; bityo Inka zacu zimererwe neza tubone umukamo mwinshi dutere imbere."

Boniface Ntahompungiye wo mu murenge wa Ruhunde yashimye RDDP ku bikoresho Itsinda abarizwamo ryahawe; avuga ko bizabafasha mu mirimo n’Ibikorwa byabo bya buri munsi byerekeranye n’Ubworozi; atanga urugero rw’uko Ingorofani bahawe izabagasha kugeza Ifumbire mu mirima bahingamo Ubwatsi.