Umufatanyabikorwa, Réseau des Femmes Oeuvrant pour le Développement Rural; tariki 24 Mutarama uyu mwaka; ku bufatanye na Institute Of Policy Analysis And Research (IPAR-Rwanda) na International Development Research Centre yatanze inkunga y’Ibigega bifata amazi y’imvura ava ku  bisenge by’Amazu ku miryango ijana na cumi (110) batuye mu Tugari twa Mudugari na Tumba, mu Murenge wa Bungwe n'Utugari twa Rwambogo na Gabiro, Umurenge wa Gatebe.

Umuhango wo gushyikiriza Abaturage iyi nkunga y’ibigega  wabereye mu Kagari ka Rwambogo, Umurenge wa Gatebe. Wayobowe n’Umuyobozi w’Akarere ka Burera wungirije ushinzwe iterambere ry’ubukungu, NSHIMYIMANA Jean Baptiste; ari hamwe n'Intumwa za  Reseau des Femmes ziyobowe na Consolée  NIYONSENGA.

Iyi nkunga y’ibigega yatanzwe mu rwego rwo gukemura ikibazo cy'imirimo idahemberwa ikorwa n'Abagore n'Abakobwa; ndetse no guteza imbere Umuryango muri rusange.

Mu butumwa bwe, NSHIMYIMANA yagize ati:"Iyi nkunga izunganira gahunda za Leta zitandukanye zigamije guteza imbere imibereho myiza y’Abaturage n’Igihugu muri rusange zirimo isuku n’Isukura, kurwanya imirire mibi n’igwingira, kurwanya no gukumira amakimbirane mu miryango;  kurwanya ikibazo cyo guta no gukererwa ishuri  ku Bana n’ibindi bibazo bitandukanye bibangamiye imibereho myiza y’Abaturage n’Iterambere muri rusange."

Yashimye uyu Mufatanyabikorwa ku bw'iyi nkunga; asaba abahawe ibigega kubifata neza no kibibyaza umusaruro bifashisha amazi bafashe aturuka ku bisenge mu guteza imbere isuku; haba ku mubiri, mu ngo; banakoreshe ayo mazi kuhira uturima tw’imboga; bityo imiryango itere imbere; kandi igire imibereho myiza.

Mu ijambo rye, NIYONSENGA yagarutse ku nyungu z’ibi bigega ku Baturage babihawe; aha akaba yaragize ati:"Twemeranya  ko kunywa no gukoresha amazi meza muri gahunda zitandukanye z’urugo ari isoko y’ubuzima bwiza; ubuzira  buzira umuze; bikaba n’ishingiro ry’iterambere ry’umuryango n’iry’igihugu muri rusange. "

Yagize kandi ati:"Inkunga Réseau des Femmes Oeuvrant pour le Développement Rural yahaye iyi miryango ije kugabanya imirimo idahemberwa ikorwa n’Abagore n’Abakobwa ituma  batabona umwanya uhagije wo kwitabira gahunda zitandukanye z’iterambere; ariko noneho ubwo Imiryango ibonye ibigega bifata amazi; umwanya wakoreshwaga mu kujya kuvoma kure uzakoreshwa mu bikorwa biteza imbere umuryango."

Umuryango wa SENYAMIGANDA Jean Pierre  na SEKANYARENZE Jeannine bo mu Kagari ka Mudugari, Umurenge wa Bungwe ni umwe mu miryango yahawe  inkunga y’ikigega cy’amazi. Mu ijambo rye, SENYAMIGANDA yagize ati:"Ikigega Réseau des Femmes ihaye umuryango wanjye; usibye kuba kizadufasha gufata amazi aturuka ku nzu; tuyakoreshe mu bikorwa by’isuku n’isukura; twuhire imboga mu turima tw’imboga; tunayakoreshe mu bindi bikorwa by’ubuzima bwa buri munsi.

Uyu muryango washimye uyu Muterankunga n’Akarere muri rusange ku bw’iyi nkunga;wizeza ko bazafata neza ikigega bahawe; banabyaze umusaruro amazi bafashe."