Umuyobozi w'Akarere ka Burera, Madame Uwanyirigira Marie Chantal, kuri uyu wa kane tariki 11 Werurwe yatangirije Igihembwe cy'Ihinga 2021B kuri Site ya Bucyaba-DERN, mu kagari ka Kabona, mu murenge wa Rusarabuye; aha hakaba hazatuburirwa Imbuto y’Ibigori y'ubwoko bwa WB605 ku buso bwa Hegitari makimyabiri (20).

Igikorwa cyo gutangiza iki gihembwe cy'ihinga (2021B) kitabiriwe n’Abafatanyabikorwa muri gahunda zitandukanye zibera mu Karere ka Burera harimo n’izi z’Ubuhinzi; muri bo hakaba harimo Padiri Jean Claude Twizeyumukiza wari uhagarariye Paruwase Gatulika ya Ruhengeri na Kamanzi Jean Pierre wari uhagarariye Pride Farms Ltd mu Ntara y’Amajyaruguru.

Atangiza iki gihembwe cy’Ihinga (kuri Site ya Bucyaba), Madame Uwanyirigira yabanje gusaba Abaturage n’abandi bitabiriye iki gikorwa kumufasha gushimira Umukuru w’Igihugu, Nyakubahwa Paul Kagame kuri gahunda nyinshi zigamije guteza imbere Akarere ka Burera n’abagatuye, ndetse n’Igihugu muri rusange; muri  byinshi yamushimiye hakaba harimo gushakira aka karere Abaterankunga n’Abafatanyabikorwa haba mu Buhinzi,ndetse n’ibindi bihateza imbere.

Madame Uwanyirigira yabwiye abaturage bari aho ko uyu mushinga utagamije gutubura Imbuto y’Ibigori gusa; ahubwo ko hazanatuburwa Imbuto y’Ibirayi; bityo abasaba guha agaciro gahunda nk’iyi igamije kugira ngo babonere hafi Imbuto nziza; zaba iz’Ibigori ndetse n’izindi, hakiyongeraho kuba bagiye kubona akazi mu mirimo izakorerwa kuri iyi Site ya Bucyaba ifite ubuso bwa Hegitari makumyabiri (20).

Yabwiye abo baturage ati:"Ibigori mugiye guhinga aha hantu; ndetse n’ibizahingwa ahandi nko kuri Site za Busaga na Ndongozi si ibyo kotsa. Iyi gahunda igamije gutubura Imbuto y’ubu bwoko bw’Ibigori (WB605) kugira ngo Abaturage ba Burera; namwe murimo bayibone hafi; tunasagurire ahandi mu gihugu, ndetse no hanze yacyo. Ibyo ntibyashoboka muramutse mutazirikanye agaciro n’intego y’iyi gahunda.Murasabwa kudatetereza Umukuru w’Igihugu cyacu, Nyakubahwa Paul Kagame ubazirikana kuri uru rwego. "

Madame Uwanyirigira yongeye kwibutsa abatuye Akarere ka Burera  akamaro ko guhuriza hamwe Ubutaka hagamijwe kubuhingaho Igihingwa cyatoranyijwe; abibutsa ko Ibigori, Ibirayi, Ingano n'Ibishyimbo ari byo bihingwa byatoranyijwe bigomba guhingwa ku  butaka bwahurijwe hamwe mu Karere ka Burera; bitabujije ko n’ibindi bihingwa babihinga; ariko bakabikora bakurikije gahunda n’Inama bagirwa n’Inzego zishinzwe Ubuhinzi ku mirenge no ku rwego rw’Akarere.

Yabasabye kandi gukoresha Ifumbire mu bikorwa byabo by’Ubuhinzi kubera ko byongera Umusaruro; kandi igihe basaruye bagahunika neza Umusaruro wabo kugira ngo utangirika.

Mu ijambo rye, Padiri Twizeyumukiza yavuze ko Paruwase Gatulika ya Ruhengeri yaje ahagarariye ishimishwa no kuba Umufatanyabikorwa w’Akarere ka Burera mu bikorwa bitandukanye bigamije guhindura imibereho y’abagatuye ikarushaho kuba myiza.

Yagize ati:"Ibigori ni kimwe mu bihingwa byatoranyijwe guhingwa muri aka karere muri gahunda yo guhuza Umutaka, kandi birahera cyane. Ni yo mpamvu nka Paruwase ya Ruhengeri twiyemeje kuba Umufatanyabikorwa mu gutubura Imbuto y’ubu bwoko bw’Ibigori kugira ngo Abaturage bayibonere hafi, babashe guhingira igihe; beze byinshi kandi byiza; batere imbere; kandi burya iyo Umuturage ateye imbere; Igihugu na cyo kiba giteye imbere; ibyo bikaba biri mu byo twimirije imbere."

Kamanzi yijeje Ubuyobozi bw’Akarere ka Burera ko; nk’abafite Ubumenyi mu gutubura Imbuto; bazakomeza kuba hafi y’Abatubuzi ba WB605 babigisha no kubagira inama kugira ngo iki gikorwa cy’itubura kizagerweho neza.

Muragijimana Solina, nk’umwe mu bahawe akazi kuri Site ya Bucyaba yagaragaje ibyishimo  ku bw’iki gikorwa cy’itubura agira ati:"Kubonera Imbuto nziza y’Ibigori ku gihe bituma Umuhinzi ahingira igihe. Iyo yitaye ku myaka ye, nta kabuza agira Umusaruro mwinshi, kandi mwiza. Ku bw’iyo mpamvu ndashimira Perezida wa Repubulika Paul Kagame kuri gahunda nyinshi zigamije gukura Abaturage mu bukene zirimo n’iyi yo  gutubura Imbuto nziza y’ibigori. He no kongera gukubita amaguru njya gushakira Imbuto kure."

Umusore w’imyaka makumyabiri (20) witwa Nirambe Elie, na we ni umwe mu bahawe akazi mu bikorwa byo gutunganya  ahazatuburirwa BW605.

Na we yagaragaje ibyishimo ku bw’iyi gahunda agira ati:"Iki gikorwa kidufitiye akamaro kanini nk’abatuye uyu murenge ndetse n’Akarere muri rusange kubera ko; usibye kuba tugiye kujya tubonera Imbuto y’Ibigori hafi tutabanje kujya kuyishaka kure; tuzabona n’akazi kadusheha amafaranga; kandi uwabonye amafaranga iyo atayapfushije ubusa atera imbere."