Uyu munsi, Umuyobozi w’Akarere wungirije ushinzwe imibereho myiza y’abaturage, Mwanangu Théophile; ari kumwe na Perezida w’Inama Njyanama y’Akarere, Bizimungu Jean Baptiste yakiriye ba Honorable Depite Mukamana Alphonsine na Mushimiyimana Lydie babarizwa muri Komisiyo y'Ubumwe bw'Abanyarwanda, Uburenganzira bwa Muntu no kurwanya Jenoside baje muri gahunda y’Inteko Ishinga Amategeko/Umutwe w’Abadepite yo kubona amakuru y'inyongera ku gikorwa yatangiye cyo gusesengura ishyirwa mu bikorwa rya Politiki y’Igihugu y'Ubumwe n'Ubwiyunge.

Ibi bigamije kumenya uruhare rw'Inzego z’Ibanze, Sosiyete Sivile, Abikorera n'Umuryango Nyarwanda muri rusange ku ishyirwa mu bikorwa ry'iyi politiki, inzitizi zihari n'ibyifuzonama mu kurushaho gusigasira ubumwe n'ubudaheranwa by'Abanyarwanda.

Iki gikorwa cyabimburiwe n’ikiganiro cyabereye ku biro by’Akarere aho izo Ntumwa za rubanda zagiranye n'Ubuyobozi bw'Akarere, uhagarariye Inama Njyanama y'Akarere; abahagarariye inzego z'umutekano; Perezida wa IBUKA ku rwego w’Akarere; uhagarariye AVEGA ku rwego rw’Akarere; abahagarariye Amadini n'Amatorero ku rwego rw'Akarere, uhagarariye Abayobozi b'ibigo by'amashuri mu Karere, abahagarariye imiryango ikora ibikorwa by'isanamitima mu Karere; Abarinzi b'Igihango ku rwego rw' Akarere; Abakangurambaga b'ubumwe n'ubwiyunge mu Karere, Abafatanyabikorwa muri gahunda z'ubumwe n'ubudaheranwa mu Karere n’abandi banyuranye; barebera hamwe uruhare rwabo mu gushyira mu bikorwa Politiki y'Igihugu y'Ubumwe n'Ubwiyunge, imbogamizi zihari n'ibyufuzonama bigamije kurushaho gushimangira ubumwe n'ubudaheranwa by'Abanyarwanda.

Umuyobozi w’Akarere wungirije ushinzwe imibereho myiza y’abaturage yagaragaje ibyo Akarere ka Burera kakoze n’ibyo kazakora muri gahunda yo gushyira mu bikorwa Politiki y’Igihugu y'Ubumwe n'Ubwiyunge agira ati:"Muri gahunda y’igenamigambi z’ubumwe n’ubudaheranwa mu Karere ka Burera hashyirwamo ibikorwa birimo gutegura ibikorwa by’ukwezi kwahariwe ubumwe n’Ubudaheranwa, gutoranya Abarinzi b’igihango ku rwego rw’Umurenge n’Akarere, gukurikirana imibereho y’Abarokotse Jenoside yakorewe Abatutsi, gutegura no gushyira mu bikorwa gahunda zo kwibuka mu minsi 100."

Yakomeje agira ati:" Dufatanya kandi n’Imiryango ya IBUKA na AVEGA gutegura inama mpuzabikorwa za buri gihembwe, kubungabunga ibimenyetso by’amateka yerekeye Jenoside yakorewe Abatutsi; gufata mu mugongo abarokotse Jenoside yakorewe Abatutsi, amahugurwa y’isanamitima mu byiciro bitandukanye by’abaturage, kongerera ubushobozi amatsinda y’ubumwe n’ubudaheranwa, gusura abari mu magororero atandukanye hagamijwe kubategura mbere y’uko barangiza ibihano bakagaruka mu muryango Nyarwanda, gushyiraho no gukurikirana Amahuriro y’ubumwe n’ubudaheranwa yo mu mashuri no kwegera imiryango ifite abafungiye icyaha cya Jenoside yakorewe Abatusti mu rwego rwo kumva neza uruhare rwabo mu nzira y’ubumwe n’ubudaheranwa."

Yavuze ko hazaomeza kubaho ubufatanye bw’inzego mu kurangiza imanza Gacaca zitararangira, gukomeza kwigisha abaturage bakangurirwa kwirinda ingengabitekerezo ya Jenoside yakorewe Abatutsi, gukomeza kubumbatira ubumwe bw’Abanyarwanda .

Muri iyi gahunda, aba Badepite bazasura Amashyirahamwe n'amatsinda y'ubumwe n'ubwiyunge, ibikorwa by'imiryango itari iya Leta bigamije guteza imbere ubumwe n'ubudaheranwa mu nzego z'ibanze (Ibikorwa bihuriweho n'abarokotse Jenoside yakorewe Abatutsi mu 1994, abayigizemo uruhare n'imiryango yabo.

Bazasura kandi imwe mu miryango itishoboye y'abarokotse Jenoside yakorewe Abatutsi mu 1994, imwe mu miryango y'abarangije igihano ku cyaha cya Jenoside yakorewe Abatutsi mu 1994 mu rwego rwo kureba uko babanye n’abandi nyuma yo gusubira mu buzima busanzwe.

Mu mwaka wa 2024 igipimo cy'ubumwe n'ubwiyunge kigaragaza ko 99% by'Abanyarwanda bashyize imbere Ubunyarwanda bakanakomera ku ndangagaciro zibwimakaza, 94.6% basobanukiwe amateka Igihugu cyanyuzemo; naho 97.1% bemeza ko babanye neza kandi bafatanya mu buzima bwabo bwa buri munsi.