Ku gicamunsi cy’uyu wa kabiri, Umuyobozi w’Akarere, Mukamana Soline yitabiriye inteko n'abaturage b’Akagari ka Mucaca, mu Murenge wa Rugengabali; Umuyobozi w’Akarere wungirije ushinzwe iterambere ry’ubukungu, Nshimyimana Jean Baptiste yitabiriye inteko y'abaturage b'Akagari ka Runoga, mu Murenge wa Gitovu; naho Umuyobozi w’Akarere wungirije ushinzwe imibereho myiza y’abaturage, Mwanangu Théophile yitabiriye inteko y'abaturage b'Akagari ka Rurembo, mu Murenge wa Rugarama. 

Mu kiganiro n’abatuye utwo Tugari bakanguriye abatuye Akarere muri rusange gukomeza kwitabira gahunda ziteganyijwe mu minsi 100 yo kwibuka ku nshuro ya 31 Jenoside yakorewe Abatutsi mu Rwanda muri 1994.

Umuyobozi w’Akarere yagize ati:" Muri iki gihe twibuka ku nshuro ya 31 Jenoside yakorewe Abatutsi; ndasaba abaturage b’Akarere ka Burera gufata mu mugongo abarokotse Jenoside yakorewe Abatutsi. Dukomeze kwirinda; kandi turwanye ingengabitekerezo ya Jenoside, ihakana n'ipfobya rya Jenoside yakorewe Abatutsi n’ikindi cyose cyabangamira ubumwe n’ubudaheranwa by’Abanyarwanda na gahunda ya Ndi Umunyarwanda yo sano muzi iduhuza."

Abagize Komite Nyobozi y’Akarere bakanguriye kandi abatuye Akarere kugira isuku umuco, kurwanya imirire mibi n'igwingira ry'abana bato, kwirinda ibikorwa by'ubucukuzi bw'amabuye y'agaciro butubahirije amategeko (ahokorerwa ibyo bikorwa), kubumbatira umutekano bakora neza irondo; bagatangira kandi ku gihe amakauru yatuma hakumirwa ibyateza umutekano muke; yatuma kandi hafatwa abakoze ibitemewe n’amategeko; gukurikiza amabwiriza agamije kwirinda ibiza n'Inkuba.

Babasabye kandi kwizigamira muri EjoHeza no kuzamura ubwizigame, gutanga Mituweli ya 2025/2026, kwita ku buzima bw'umwana mu minsi igihumbi; abatwite bakipimisha inda inshuro 8, bakabyarira kwa Muganga, bagakingiza abana inkingo zose n'imikurire; kandi bakita ku burere n'uburezi bw'abana; by'umwihariko muri iki gihe abana bari mu biruhuko. 

Muri icyo kiganiro, abagize Komite Nyobozi basabye kandi abatuye Akarere kubahiriza ibikubiye mu itegeko rigenga abantu n'umuryango, kwirinda ubusinzi, ibiyobyabwenge, amakimbirane n'ibindi byabangamira umutekano, imibereho myiza n'iterambere by'umuryango.

Bakiriye; kandi bakemura ibibazo bagejejweho n'abaturage b’utwo Tugari bitabiriye inteko.