Uyu munsi, mu Mirenge igize Akarere ka Burera hakozwe umuganda rusange usoza ukwezi kwa Nzeri 2024 wahuriranye n’isozwa ry’icyumweru cyahariwe ubukangurambaga ku kwimakaza ihame ry'uburinganire mu Ntara y’Amajyaruguru.

Umuyobozi w'Akarere, Mukamana Soline n'abandi bagize Komite Nyobozi y'Akarere, abagize Inama Njyanama y'Akarere n'abagize inama y'umutekano itaguye y'Akarere bitabiriye umuganda wabereye mu Kagari ka Rubona, Umurenge wa Nemba.

Uwo muganda witabiriwe n’Umunyamabanga wa Leta muri Minisiteri y’Ububanyi n’Amahanga ushinzwe ubutwererane bw’Akarere; akaba n’Imboni y'Akarere ka Burera, Gen (Rtd) James Kabarebe, Guverineri w'Intara y'Amajyaruguru, Mugabowagahunde Maurice, abagize Komite y'Umutekano itaguye y'Intara y'Amajyaruguru n'Umugenzuzi Mukuru w’Urwego rw’Igihugu rushinzwe iyubahirizwa ry’Ihame ry’Uburinganire, Umutoni Gatsinzi Nadine. Aba bashyitsi bakiriwe n'Umuyobozi w'Akarere ka Burera.

Uwo muganda waranzwe n’ibikorwa birimo gutera imboga n’ibiti by'imbuto bivangwa n’imyaka, gupima abana bari munsi y’imyaka itanu imikurire, kubagaburira indyo yuzuye n’amata, gupima indwara zitandura, kuboneza urubyaro, gucukura no gusibura ibyobo bifata amazi aturuka ku nzu, imiringoti n’imirwanyasuri, gusana ibiraro, gusibura imiferege y’amazi no guhanga imihanda y'imigenderano.

Umuyobozi w’Akarere, Mukamana Soline yasabye abaturage bitabiriye umuganda kurwanya imirire mibi n’igwingira bagaburira abana indyo yuzuye, gukora cyane no kunoza umurimo hagamijwe kwiteza imbere, kugira isuku umuco, kwirinda amakimbirane, ubusinzi no kwishora mu biyobyabwenge aho biva bikagera.

Mu ijambo rye, Gen (Rtd) James Kabarebe yasabye ubuyobozi bw’Akarere gukemura ibibazo bigaragara bibangamiye imibereho myiza y’abaturage. Yasabye kandi Abafatanyabikorwa b’Akarere kurushaho kugira uruhare gukemura ibyo bibazo.

Yasabye abatuye Akarere ka Burera kwirinda icyo ari cyo cyose cyabangamira ubumwe n’ubudaheranwa; bagasigasira gahunda ya Ndi Umunyarwanda.

Gen (Rtd) James Kabarebe yibukije abakozi b’Akarere ko umuturage agomba kuba ku isonga; aha akaba yaragize ati:" Buri wese mu byo ashinzwe akwiriye guha umuturage serivisi nziza. Guha umuturage serivisi nziza bivuga kumwakira neza, ukamutega amatwi, ukumva icyo akeneye, ugakemura ikibazo yakugejejeho cyangwa ukamugira inama igihe ayikugishije."

Yijeje ubuyobozi bw’Akarere ko; nk’Imboni y’Akarere azakomeza kubaba hafi abagira inama kugira ngo imibereho y’agatuye aka Karere ikomeze kuba myiza.