Ukwezi kwahariwe ibikorwa by'ubukorerabushake kwasorejwe ku rwego rw'Igihugu mu Karere ka Burera ahabereye ibikorwa bitandukanye bijyanye n'isoza ryako.

Umushyitsi mukuru muri uyu muhango yari Guverineri w'Intara y'Amajyaruguru, Mme NYIRARUGERO Dancille wari hamwe n'Umuyobozi mukuru muri Minisiteri y'Ubutegetsi bw'Igihugu ushizwe ibikorwa by'ubukangurambaga no guhuza ibikorwa by'Urubyiruko rw'Abakorerabushake, Bwana KUBANA Richard n'abagize inama y'umutekano itaguye y'Intara y'Amajyaruguru. 

Ubwo Abashyitsi bageraga mu Karere ka Burera bakiriwe n'Umuyobozi wako wungirije ushinzwe imibereho myiza y'Abaturage, Bwana MWANANGU Theophile. Abashyitsi bifatanyije n'Urubyiruko rw'Abakorerabushake ndetse n'Abaturage gutera ibiti ku nkengero z'Umuhanda mu kagari ka Kabyiniro, mu Murenge wa Cyanika. 

Bamaze gutera ibiti; Guverineri w'Intara y'Amajyaruguru, Umuyobozi mukuru muri Minisiteri y'Ubutegetsi bw'Igihugu ushizwe ibikorwa by'ubukangurambaga no guhuza ibikorwa by'Urubyiruko rw'Abakorerabushake n'abagize inama y'umutekano itaguye y'Intara y'Amajyaruguru n'abagize inama y'umutekano itaguye y'Akarere basuye Irerero mbonezamikurire ryo mu rugo (Home-based ECD) mu Kagari ka Kabyiniro aho bagaburiye Abana baharererwa, kandi babaha Amata.

Ibindi byaranze umuhango wo gusoza Ukwezi kwahariwe ibikorwa by'Ubukorerabushake mu Karere ka Burera harimo kuba Urubyiruko rw'Abakorerabushake muri aka Karere baremeye bagenzi babo mirongo ine na babiri (42) babaha Intama.Na none kandi rworoje Imiryango itanu (05) itishoboye; ruyiha Intama.

Mu byakozwe n'Urubyiruko rw'Abakorerabushake mu kwezi kwahariwe ibikorwa by'Ubukorerabushake harimo kuba rwarubakiye imiryango cumi n'icyenda (19) itishobiye amazu; amwe muri yo akaba yarasanwe; bubakiye imiryango itishoboye ubwiherero bwujuje ibisabwa mirongo irindwi na butandatu (76); kandi barwanywa isuri ku buso bungana na hegitari esheshatu.

Ibindi bakoze harimo ubukangurambaga bugamije guteza imbere isuku n'isukura; bagira kandi uruhare mu bukangurambaga bugamije kurwanya isuri, COVID-19, kwishora mu Biyobyabwenge no gukumira Ebola. 

Mu butumwa Guverineri, Mme NYIRARUGERO Dancille, Bwana KUBANA Richard n'abagize inama y'umutekano itaguye y'Intara y'Amajyaruguru bagejeje ku Rubyiruko rw'Abakorerabushake barushimiye uruhare bagira mu gukemura ibibazo bibangamiye imibereho myiza y'Abaturage; babasaba kurushaho kugira uruhare mu bukangurambaga bugamije kurwanya ibikorwa byo kwishora mu Biyobyabwenge, kurwanya inda ziterwa Abangavu, kurwanya isuri, kandi bakagira uruhare mu gukumira guta no gusiba ishuri ku Bana.

Guverineri, Mme NYIRARUGERO Dancille yagize ati: "Uku kwezi kurasojwe; ariko ibikorwa by’ubukorerabushake birakomeje; mukomeze kugira uruhare mu gukemura ibibazo bibangamiye   imibereho myiza y’Abaturage; kurwanya magendu n’ibiyobyabwenge, n’indi myifatire idakwiriye. Murasabwa kuba intangarugero aho mutuye mu guhindura urubyiruko bagenzi banyu bacyishora mu ngeso mbi mubakangurira kureka imyitwarire mibi."

Yashimye ibikorwa by'Urubyiruko rw'Abakorerabushake mu Ntara y'Amajyaruguru; agaragaza ko ibikorwa byabo bigira uruhare runini mu iterambere ry'iyi Ntara n'abayituye ndetse n'Igihugu muri rusange; arwizeza ko ubuyobozi bw'Intara y'Amajyaruguru buzakomeza kubaba hafi.

Mu ijambo rye, Bwana KUBANA Richard yabwiye Urubyiruko rw'Abakorerabushake rwa Burera ati:" Uruhare rwanyu mu gukemura ibibazo bibangamiye imibereho myiza y'Abaturage ruragaragara. Minisiteri y'Ubutegetsi bw'Igihugu mpagarariye muri uyu muhango irabashimira; mukomereze aho; kandi mukangurire urubyiruko rutari Abakorerabushake kuba bamwe muri mwe."

Yasabye Urubyiruko rw'Abakorerabushake gushyira mu bikorwa imyanzuro yafatiwe mu nama n'amahugurwa yabaye mu bihe bitandukanye