Kuri uyu wa 25 Ugushyingo; uyu mwaka; mu Midugudu igize Akarere habereye umuganda rusange usoza ukwezi k’Ugushyingo; uyu mwaka waranzwe n'ibikorwa birimo kubakira imiryango ifite amikoro make inzu n'ubwiherero, gusiza ibibanza bizubakwamo ibikorwa by'iterambere harimo amashuri, gucukura no gusibura imirwanyasuri n'ibyobo bifata amazi.

Umuyobozi w'Akarere w'agateganyo, Bwana NSHIMYIMANA Jean Baptiste, Honorable MUREBWAYIRE Christine, bamwe mu bagize Inama Njyanama y'Akarere na CIP MUGENZI Jean Bosco wari uhagarariye umuyobozi wa Polisi mu Karere bitabiriye umuganda wabereye mu Mudugudu wa Burabwa, Akagari ka Ruyange, Umurenge wa Cyeru ahasijwe ikibanza cyo kubakamo ishuri ry'imyuga.

Umuyobozi w’akarere wungirije ushinzwe imibereho myiza y’abaturage , Bwana MWANANGU Theophile, Honorable MUHAKWA Valens n'abagize Inama Njyanama y'Akarere bitabiriye umuganda wabereye mu Mudugudu wa Kanyaminyinya, Akagari ka Musasa, Umurenge wa Kinyababa ahakozwe amaterasi y'indinganire.

Mu kiganiro abayobozi bagiranye n'abitabiriye umuganda; babashishikarije kwandikisha abavuka no kwandukuza abapfuye mu bitabo by'irangamimerere, kugira isuku umuco, kwirinda ubusinzi, ihohotera aho riva rikagera n’ibikorwa byo kwishora mu biyobyabwenge.

Babakanguriye kandi kurwanya isuri n'ibiza; bacukura, banasibura imirwanyasuri n'ibyobo bifata amazi, kurwanya imirire mibi n'igwingira, kwirinda amakimbirane, gukora cyane no kunoza umurimo hagamijwe kwiteza imbere