Mu rwego rwo kwihutisha ikemurwa ry'ibibazo bibangamiye imibereho myiza y'Abaturage; uyu munsi, mu Mirenge igize Akarere habereye ibikorwa by'Umuganda wateguwe ku rwego rw'Akarere waranzwe n'ibikorwa birimo kubakira Imiryango itishoboye amazu, kubumba inkarakara zo gukoresha mu kuyubakira amazu, gutunda itaka ryo gukoresha mu kubumba inkarakara zo gukoresha mu kuyubakira amazu no gusiza ibibanza izubakirwamo amazu n'ahazubakwa ibikorwaremezo bitandukanye birimo amashuri.

 Umuyobozi w'Akarere, UWANYIRIGIRA Marie Chantal yifatanyije n'Abaturage n'Inzego zitandukanye mu muganda wabereye mu Kagari ka Bungwe, Umurenge wa Bungwe aho bashije ikibanza kizubakwamo Ishuri ry'Imyuga, Tekiniki n'Ubumenyi ngiro (TVET).

Umuyobozi w'Akarere wungirije ushinzwe iterambere ry’Ubukungu, NSHIMYIMANA Jean Baptiste yifatanyije n'Abaturage n'Inzego zitandukanye mu muganda wabereye mu Kagari ka Gafumba, Umurenge wa Rugarama; aho babumbye inkarakara zo kubakisha inzu y'umuryango utishoboye uhabarizwa.

Umuyobozi w'Akarere wungirije ushinzwe imibereho myiza y’Abaturage, MWANANGU Theophile yifatanyije n'Abaturage n'Inzego zitandukanye mu muganda wabereye mu Kagari Nkumba, Umurenge wa Kinoni; aho batunze itaka ryo kubumbisha inkarakara zo kubakisha inzu y'umuryango utishoboye uhabarizwa.

Inzego zitandukanye zikorera mu Karere (Ingabo, Polisi n'izindi) n'Abayobozi bazo n'Abafatanyabikorwa b'Akarere bifatanyije n'Abaturage mu muganda wabereye mu Mirenge igize Akarere aho bakoze ibikorwa bitandukanye bigamije guteza imbere imibereho myiza y'Abaturage.

Nyuma y'umuganda, Ubuyobozi bw'Akarere; ku bufatanye n'Abayobozi b'Inzego zikorera mu Karere bagiranye ikiganiro n'Abaturage bawitabiriye kibanze ku kubasobanurira gahunda ya Leta yo kuvana Abaturage mu bukene mu buryo burambye, babakangurira kandi kugira umuco w'isuku n'isukura.

Abayobozi basobanuriye kandi Abaturage uruhare rwabo mu kwesa imihigo y'Akarere n'ingaruka zo kwishora mu Biyobyabwenge; babakangurira kwirinda kubitunda,kubikwirakwiza, kubicuruza no kubinywa; babasaba kugira uruhare mu kubirwanya batangira ku gihe amakuru ajyanye n'ababikora.