Uyu munsi tariki 18 Ugushyingo; uyu mwaka; mu Mirenge igize Akarere habereye umuganda wihariye w'urubyiruko waranzwe n'ibikorwa birimo gutegura ibibuga by'imikino, kubakira imiryango ifite amikoro make inzu, kubumba amatafari no gutunda amabuye yo kuzubakisha, gusiza ibibanza bizubakwamo ibikorwa bitandukanye by'iterambere, gutera ibiti, gucukura no gusibura imirwanyasuri n'ibyobo bifata amazi.

Umuyobozi w'Akarere w'agategamyo, Bwana NSHIMYIMANA Jean Baptiste; hamwe na CIP Jean Bosco MUGENZI; wari uhagarariye Umuyobozi wa Polisi mu Karere, Umukozi ushinzwe urubyiruko, umuco na siporo mu Karere, Umuyobozi w'ingabo zikorera mu Murenge wa Kivuye, Gatebe na Bungwe; Abajyanama mu Nama Njyanama y'Umurenge wa Kivuye n'abandi bahagarariye inzego zitandukanye mu Murenge wa Kivuye bitabiriye umuganda wabereye mu Mudugudu wa Kanyenzugi, Akagari ka Nyirataba, Umurenge wa Kivuye; aho bafatanyije n'urubyiruko gusiza ikibanza cy'umupira w'amaguru.

 Nyuma y'umuganda; urubyiruko rwawitabiriye rwahawe ikiganiro gifite insanganyamatsiko igira iti: "Umuco wo gukunda Igihugu, kukitangira n'uruhare rw'urubyiruko mu iterambere ryacyo".

Mu butumwa Umuyobozi w'Akarere w'agateganyo yagejeje ku rubyiruko yakoranye na rwo umuganda; bwahawe urubyiruko nyuma y'umuganda mu Mirenge igize Akarere; yarusabye kwirinda icyo ari cyo cyose cyabangamira ubumwe bw'Abanyarwanda; ibi bikajyana no kwimakaza gahunda ya Ndi Umunyarwanda; arukangurira gukunda no kunoza umurimo, gukorera no guharanira kugera ku intego.

Yarukanguriye kandi gushyigikira gahunda za Leta ziriho zigamije iterambere no kuzamura imibereho myiza y'Abaturage,gushyira imbere Ubunyarwanda bugaragazwa n'ubupfura butuma  umuntu agira umutima wo kwita kuri mugenzi we no gusigasira ibyo u Rwanda rumaze kugeraho.

Abitabiriye umuganda basabwe kandi kubahiriza amabwiriza n'amategeko yerekeranye no kugenda mu muhanda no gutwaramo ibinyabiziga; ubu bukangurambaga bukaba bugamije gukumira no kurwanya impanuka mu muhanda mu bukangurambaga bwa Gerayo Amahoro.