Iyi gahunda ya “TUBATUZE HEZA” igamije gukemura ibibazo bibangamiye imibereho myiza y’abaturage yatangirijwe ku mugaragaro mu Mirenge ya Kinoni,Gahunga ,Rugarama, Cyanika na Kagogo ku itariki 26 Kanama 2024; iyi gahunda ikaba izashyirwa mu bikorwa binyuze mu muganda udasanzwe uzamara icyumweru uzabera muri iyi Mirenge ahazubakirwa imiryango 444 idafite inzu; hakaba na none hazubakirwa imiryango 2007 ituye mu nzu zaho zitameze neza.

Gukorera uyu muganda udasanzwe muri iyi Mirenge hashingiwe kuba abayituye bahura n'imbogamizi zo kubura itaka ryo kubakisha bitewe n'uko ubutaka bwaho bugizwe ahanini n'amakoro.

Gutangiza ku mugaragaro uyu muganda udasanzwe byabereye mu Kagari ka Nyamabuye, mu Murenge wa Kagogo aho Umuyobozi w'Akarere, MUKAMANA Soline, Umuyobozi wako wungirije ushinzwe imibereho myiza y’abaturage, MWANANGU Théophile, Chief Inspector of Police (CIP) MUGENZI Jean Bosco wari uhagarariye Umuyobozi wa Polisi mu Karere, Umunyamabanga Nshingwabikorwa w'Umurenge wa Kagogo, BUTOYI Louis n'abari bahagarariye abafatanyabikorwa batandukanye harimo New Bugarama Mining Company Ltd na NPD Ltd yatunze itaka, irigeza ahazubakwa izo nzu bafatanyije n'abaturage b'Akagari ka Nyamabuye, muri Kagogo kubumba inkarakara zo kubakisha inzu y'umwe mu miryango izubakirwa inzu muri iyi gahunda ya Tubatuze Heza.

Mu kiganiro Umuyobozi w'Akarere, MUKAMANA Soline yagiranye n'abitabiriye umuganda mu Kagari ka Nyamabuye yabakanguriwe gukomeza gukorera hamwe, guhuza imbaraga no kwishakamo ibisubizo hakemurwa ibibazo bimwe na bimwe abaturage bahura na byo, kugira isuku umuco, kwizigama muri Ejo Heza no kohereza abana kurererwa muri bigo mbonezamikurire y’abana bato.

Yagize ati:"Kwishakamo ibisubizo ni umuco w’abaturage b’Akarere ka Burera n’Abanyarwanda muri rusange. Ndabasaba kuzakomeza kwitabira uyu muganda kugeza abadafite amacumbi bayabonye. Ndashima ubuyobozi bwa NPD Ltd ku bufasha bwayo mu gukemura mu buryo burambye ikibazo cya bamwe mu baturage batagira inzu bitewe n’uko bitaboroheye kubona itaka ryo gukoresha."

Yabasabye kandi gutanga umusanzu w’ubwisungane mu kwivuza bwa Mituweli, kwirinda ibiyobyabwenge, ubusinzi n'amakimbirane, kwitegura neza igihembwe cy'ihinga cya 2025A, kwitegura neza itangira ry'amashuri, kuzakomeza kwitabira uyu muganda, kuzohereza abana bose biga ndetse n'abageze igihe cyo kwiga ku ishuri no kubahiriza amabwiriza agamije kwirinda no kurwanya indwara y’Ubushinza bw’Inkende.