Kuri uyu wa kane tariki 11 Mutarama 2023, Umuyobozi w'Akarere, MUKAMANA Soline yatangije gahunda ya DUHARI KU BWANYU mu tugari tugize Akarere ka Burera igamije kurushaho  gushyira umuturage ku isonga no kumwegera hagamijwe kumutega amatwi no kumusobanurira gahunda za Leta n’inshingano z’abayobozi mu inzego z’ibanze n’ibindi byiciro bikorera mu Karere.

Gutangiza ku mugaragaro iyi gahunda byabereye mu Murenge wa Cyanika. Iyi gahunda yitabiriwe n’Umuyobozi w’Akarere wungirije ushinzwe imibereho myiza y’abaturage, MWANANGU Theophile n'abandi bayobozi barimo Umuyobozi w'Inkeragutabara mu Karere, Lt Col. Fred NYIRINKWAYA, Umuyobozi wa Polisi mu Karere, Senior Superintendent of Police (SSP) Aphrodis NKUNDINEZA, Umuyobozi wa REG mu Karere n'Umuyobozi wa WASAC mu Karere.

Atangiza iyi gahunda; Umuyobozi w’Akarere yabwiye  abitabiriye umuhango wo kuyitangiza ku mugaragaro ko izafasha mu kurushaho gusigasira umutekano, kurushaho gusobanurira abaturage itegeko rigenga umuryango, inshingano z’abunzi, kurangiza imanza, imitangire ya serivisi z’ubutaka, EjoHeza, kurwanya ruswa n’akarengane, imitangire ya serivisi z’irangamimerere, kurwanya  Banki Lamberi, gahunda yo kwivana mu bukene, kujyana abana ku ishuri, isuku n’isukura no kurwanya imirire mibi n'igwingira.

Nyuma yo gusobanurira abaturage umusaruro witezwe kuri iyi gahunda; bahawe umwanya, batanga ibitekerezo, babaza ibibazo, batanga n’ibitekerezo kuri iyi gahunda.

Mu butumwa bw’Umuyobozi w’Akarere yagize ati:"Iyi gahunda ije gushimangira ihame ry’umuturage ku isonga. Abaturage bakwiye kumenya ko turi mu nshingano kugira ngo tubahe serivisi nziza; tubakemurire ibibazo neza; kandi ku gihe."

Umuyobozi w’Akarere, MUKAMANA Soline  yagize kandi ati:" Ibyo dukora nk’abayobozi mu inzego z’ibanze bigomba kuba biri mu inyungu z’umuturage. Nk’uko iyi gahunda yitwa; Turiho ku bw’Abaturage; bityo rero dusabwa kuhaba serivisi nziza. "

Batangiza iyi gahunda mu Mirenge, Abanyamabanga Nshingwabikorwa b’Imirenge bayisobanuriye abaturage; banababwira umusaruro  witezwe muri iyi gahunda; babasaba kugira uruhare mu ishyirwa mu bikorwa ryayo.