Umuyobozi w'Akarere w'agateganyo, NSHIMYIMANA Jean Baptiste yakanguriye abagatuye kubahiriza amabwiriza n’ingamba bigamije gukumira no kurwanya ibiza mu Karere.

Ubu butumwa yabutanze kuri uyu wa gatanu tariki 16 Nzeri uyu mwaka mu gikorwa cy’umuganda wabereye mu Mudugudu wa Rugandu, Akagari ka Rukandabyuma, Umurenge wa Rugengabari; aho abawitabiriye bakoze ikiraro cyangijwe n'imvura; uyu muganda ukaba warakozwe muri gahunda y’umuganda wihariye wateguwe n’Akarere ugamije gukumira no kurwanya ibiza mu Karere .

Mu byaranze umuganda wabereye mu Mirenge igize Akarere harimo kubaka inzu z'imiryango yasenyewe n'ibiza, gucukura no gusibura ibyobo bifata amazi n'imirwanyasuri ahantu hatandukanye no gukora ibiraro byangijwe n'imvura.

Mu butumwa Umuyobozi w'Akarere w'agateganyo, NSHIMYIMANA Jean Baptiste yagejeje ku baturage bitabiriye umuganda yabakanguriwe kuzirika neza ibisenge by'inzu zabo; bakanakora neza fondasiyo z'inzu zabo ku buryo zishobora guhangana n'ibiza, gucukura no gusibura imirwanyasuri n'ibyobo bifata amazi ava ku nzu, gusibura inzira z'amazi no kuyayobora aho agenewe kujya; kandi bagakurikiza andi mabwiriza n'ingamba zigamije gukumira no kurwanya ibitera isuri.

Yagize ati:"Ibiza byangiriza ibikorwaremezo birimo imihanda, amashuri, ibikorwa by’amazi n’amashanyarazi n’ibitaro. Byangiza kandi inyubako zirimo iza Leta n’iz’Abaturage. Bikomeretsa; bikanahitana abantu n’Amatungo. Kubahiriza amabwiriza agamije kurwanya ibiza bituma bimwe mu biza bikumirwa."

Umuyobozi w'Akarere w'agateganyo, NSHIMYIMANA Jean Baptiste yakanguriye kandi abaturage bitabiriye umuganda kwirinda ubusinzi, guteza imbere umuco w'isuku n'isukura, kurwanya imirire mibi n'igwingira, kwizigama muri EjoHeza, kwirinda ibikorwa byo gutunda, gukwirakwiza, gucuruza, kunywa no gukoresha mu buryo bumwe cyangwa ubundi ibiyobyabwenge; kwirinda ihohotera ririmo irishingiye ku gutsina ; kandi bakirinda amakimbirane.