Mu nama Umuyobozi w'Akarere w'agateganyo, NSHIMYIMANA Jean Baptiste yakoranye n’urubyiruko rwo mu Murenge wa Kagogo n’uwa Cyanika yabereye mu Kagari ka Kayenzi, mu Murenge wa Cyanika yabaye tariki 05 Ukwakira uyu mwaka yabakanguriye kugira uruhare mu gukumira no kurwanya ibikorwa byo gutunda, gukwirakwiza, gucuruza no kunywa ibiyobyabwenge.

Muri iyi nama; Umuyobozi w'Akarere w'agateganyo yari kumwe n'umukozi w'Akarere ushinzwe urubyiruko, umuco na siporo, NSENGIYUMVA Jean de la Croix, Umuhuzabikorwa w'Inama y'Igihugu y'Urubyiruko ku rwego rw'Akarere, BUNANE Théoneste , Umuhuzabikorwa w'Itorero ku rwego rw'Akarere , TWAHIRWA Corneille, uwari uhagarariye Umuyobozi wa Polisi mu Karere, Chief Inspector of Police (CIP) Jean Claude GAKWANDI n'Umunyamabanga Nshingwabikorwa w'Umurenge wa Kagogo, MWAMBUTSA Amani Wilson.

Mu biganiro byahawe uru rubyiruko; rwakanguriwe kwitabira gahunda ya NDI UMUNYARWANDA; kwirinda imyitwarire yaruganisha mu ngeso mbi zagira ingaruka mbi ku hazaza habo; kwitabira no kunoza umurimo bakiteza imbere; gusigasira iby’Igihugu kimaze kugeraho; bakagira kandi uruhare mu gukemura ibibazo bibangamiye imibereho myiza y’Abaturage bitabira ibikorwa by’umuganda na gahunda z’iterambere zitandukanye.

Uru rubyiruko rwasabwe kandi kwitabira gukoresha Imbuga nkoranyambaga; banyomoza amakuru y’ibinyoma avuga nabi Ubuyobozi bw’u Rwanda; bakagaragaza isura nziza y’Igihugu n’iterambere kimaze kugeraho.  

Mu kiganiro Umuyobozi w'Akarere w'agateganyo, NSHIMYIMANA Jean Baptiste yagiranye n’uru rubyiruko rwo muri  Kagogo na Cyanika yarweretse ingaruka zo kwishora mu Biyobyabwenge; arubwira ko gutunda, gukwirakwiza, gucuruza no kunywa Kanyanga n’ibindi biyobyabwenge ari icyaha; kandi ko bitera ubukene ubyishoramo ; bikanatera uburwayi ababinywa.

Yagize ati:"Nk’uko byitwa; Ibiyobyabwenge byangiza ubwenge. Ubinyoye ata ubwenge; ari na byo biviramo bamwe gukora ibinyuranyije n’amategeko. Kwishora mu biyobyabwenge bitera ubukene kubera ko iyo bifashwe birangizwa; uwabishoyemo amafaranga agahomba. Na none kandi; ibiyobyabwenge bigabanya ubushobozi bwo gutekereza ibiteza imbere umuntu; bikaba kandi bigabanya imbaraga z’umubiri; kandi udakora arakena."

Yarusabye kwirinda ibikorwa byo kwishora mu biyobyabwenge aho biva bikagera; kugira uruhare mu kurwanya itundwa, ikwirakwiza, icuruzwa, inyobwa n’ikoreshwa ryabyo; bagira inama ababikora kubireka; bakangurira urubyiruko bagenzi babo n’abaturage muri rusange kubyirinda."

Muri iyi nama; uru rubyiruko rwahawe ibiganiro ku ngingo zitandukanye zirimo gahunda ya NDI UMUNYARWANDA, kuzirikana Ubumwe n'Ubudaheranwa bw'Abanyarwanda, imikorere igamije kwihutisha iterambere ry’u Rwanda twifuza, gukoresha neza Imbuga nkoranyambaga hagamijwe kunyomoza ibinyoma bivugwa ku Rwanda n’Ubyobozi bwarwo no kugira uruhare mu kwarwanya ibikorwa byo kwishora mu biyobyabwenge.