Kuri uyu wa kabiri; tariki 17 Nzeri uyu mwaka, Umuyobozi w'Akarere, Mukamana Soline, ari kumwe na Visi Perezida w'Inama Njyanama y'Akarere, Uwamwiza Catherine, intumwa ya Minisiteri y’Ububanyi n’Amahanga n’Ubutwererane, Nyakana Oswald, abagize inama y'umutekano itaguye y'Akarere n'Umuyobozi w'umupaka wa Cyanika, Francis Bayingana yakiriye kuri uyu mupaka, mu Murenge wa Cyanika  itsinda ry'intumwa z'Umuryango w'Ibihugu by'i Burasirazuba zari ziyobowe na John Balongo wamushyikirije ibendera ry'uyu Muryango riri gutambagizwa mu Bihugu biwugize.

Muri iyi gahunda yo kurizengurutsa mu Bihugu bigize uyu Muryango, iri Bendera riherekejwe n'itsinda ry'abatwaye amagare baturuka mu Bihugu bigize uyu Muryango.

Ibindi byaranze iki gikorwa harimo gutera igiti cy'urwibutso cyiswe 'Ubumwe'; cyatewe ku butaka butagira uwo buherereyeho kuri uyu mupaka; banuhirira ikindi giti cy'urwibutso gisanzwe kihatewe.

Umuyobozi w'Akarere, Mukamana Soline yashimye Umuryango w'Ibihugu by'i Burasirazuba ku bw’iki gikorwa n’itsinda ryamushyikirije Ibendera, yifuriza urugendo ruhire itsinda rikomeje gahunda yo kuritambagiza mu Bihugu bigize uyu Muryango.

Yagize ati:" Mu izina rya Guverinoma y’u Rwanda n’Akarere ka Burera  by’umwihariko; ndashima  Umuryango w'Ibihugu by'i Burasirazuba na buri wese wagize uruhare muri iki gikorwa cyo gushyikiriza u Rwanda Ibendera ry’Umuryango w'Ibihugu by'i Burasirazuba rubereye Umunyamuryango rikomeje gutambagizwa mu Bihugu biwuguze."

Yagize kandi ati:"Ndashima kandi itsinda ry’abatwaye amagare baherekeje Ibendera baturutse mu Bihugu bigize uyu Muryango. Mbifurije urugero ruhire aho bazanyura hose bariherekeje."

Mu ijambo rye, John Balongo yagize ati:" Mu izina ry’Umuryango w'Ibihugu by'i Burasirazuba no mu izina ry’itsinda nyoboye; ndashima Ubuyobozi Bukuru bw’u Rwanda ku buryo twakiranwe urugwiro ku mupaka wa Cyanika n’Umuyobozi w’Akarere ka Burera n’abandi bayobozi bari kumwe na we; kandi turishimira ko igikorwa cyo gushyikiriza u Rwanda Ibendera ry’uyu Muryango cyagenze neza."