Abiherewe ububasha na Minisitiri w'ubutabera; akaba n'Intumwa Nkuru ya Leta; uyu munsi, Umuyobozi w'Akarere, Mukamana Soline yakiriye indahiro z'Abahesha b'Inkiko batari ab'umwuga batanu basanzwe ari Abanyamabanga Nshingwabikorwa b'Utugari, abashinzwe Irangamimerere na Notariya mu Mirenge ya Rusarabuye na Bungwe n’umukozi ushinzwe ubutaka, imiturire n’ibikorwaremezo mu Murenge wa Ruhunde. 

Abanyamabanga Nshingwabikorwa b’Utugari barahiye ni Niyibizi Aimé w'Akagari ka Kaganda, mu Murenge wa Kinyabana; Byadunia Mathieu w'Akagari ka Musasa, mu Murenge wa Gitovu, Bimenyimana Théogene w'Akagari ka Rushara, mu Murenge wa Nemba, Nshimiyimana Eric w'Akagari ka Kivumu, mu Murenge wa Nemba na Tuyishimire Jean Damascene, Umunyamabanga Nshingwabikorwa w'Akagari ka Mariba, Umurenge wa Gitovu.

Yakiriye kandi indahiro z'abakozi babiri bashinzwe Irangamimerere na Notariya mu Mirenge, abo akaba ari Mugeni Francine ukorera mu Murenge wa Rusarabuye na Niyitegeka Jean de la Croix ukorera mu Murenge wa Bungwe. Na none kandi yakiriye  indahiro y’umukozi ushinzwe ubutaka, imiturire n’ibikorwaremezo mu Murenge  wa Ruhunde, uwo akaba ari Kanakuze Catherine.

Mu mpanuro Umuyobozi w'Akarere yahaye abarahiriye izo nshingano yagize ati:"Indahiro murahiriye muri iki cyumba ni igihango mugiranye n’abaturage ko muzabaha serivisi nziza."

Yabasabye kurangwa n'ubunyangamugayo, ubushishozi no kubahiriza amategeko mu gufata ibyemezo; kandi bakagisha inama ku byo babona birenze ububasha n'ubushobozi bwabo.