Tariki 08 Mutarama 2024, itsinda rigizwe n'Umuyobozi w'Akarere, MUKAMANA Soline, Umunyamabanga Nshingwabikorwa w'Akarere, James KARANGWA, umukozi w'Akarere ushinzwe urubyiruko,umuco na siporo, NSENGIYUMVA Jean de la Croix n'umukozi w'Akarere ushinzwe uburinganire n'iterambere ry'umuryango, IYAKAREMYE Jeannette; bari  hamwe na Guverineri w’Intara y’Amajyarugu, MUGABOWAGAHUNDE Maurice, Guverineri w’Intara y’Ibirasirazuba, Pudence RUBINGISA, Abayobozi b’Uturere tugize izi Ntara, abakozi bashinzwe urubyiruko,umuco na siporo n’abakozi bashinzwe uburinganire n'iterambere ry'umuryango mu Turere tugize Intara y’Amajyarugu n’Intara y’Ibirasirazuba basuye, bagirana ikiganiro n'abagororerwa mu kigo Ngororamuco cya Nyamagabe bo mu Karere ka Burera cyibanze ku kubakangurira guhinduka; bakareka ibyatumye bazanwa kugororwa.

Abayobozi basuye iki Kigo Ngororamuco cya Nyamagabe, mu Karere ka Nyamagabe bakiriwe n'Umuyobozi wungirije w’Ikigo cy’Igihugu gishinzwe igororamuco, Rtd CP Faustin NTIRUSHWA; naho abasuye Ikigo Ngororamuco cya IWAWA bakiriwe n'Umuyobozi mukuru w’Ikigo Ngororamuco cya IWAWA, Fred MUFULUKYE.

Ku munsi ukurikiyeho tariki 09 Mutarama 2024, Umuyobozi w'Akarere, Umunyamabanga Nshingwabikorwa w'Akarere,  n’abandi  bagize itsinda ryasuye Ikigo Ngororamuco cya Nyamagabe  basuye Ikigo Ngororamuco cya IWAWA,mu Karere ka Rutsiro.

Mu kiganiro Umuyobozi w'Akarere, MUKAMANA Soline n’Umunyamabanga Nshingwabikorwa w'Akarere, James KARANGWA bagiranye n’abo mu Karere ka Burera bagororerwa muri ibi Bigo Ngororamuco bya Nyamagabe na Iwawa, babagejejeho ibibazo bafite birimo ibifitanye isano n'imiryango yabo; Umuyobozi w'Akarere abizeza ko agiye gufatanya n'inzego bireba kubikurikirana.

Yabasabye gukurikira neza amasomo bahabwa kuko azatuma bahinduka; bakareka imyitwarire n’ibyatumye bazanwa kugororwa; bakarangwa n'imyitwarire n'ibikorwa mbonera.

Umuyobozi w'Akarere n’Umunyamabanga Nshingwabikorwa wako baganirije kandi abagororerwa muri ibi Bigo Ngororamuco bo mu Karere ka Burera kuri gahunda zitandukanye zigamije imibereho myiza n’iterambere muri rusange.

Mu butumwa bwe ku bagororerwa muri ibi Bigo Ngororamuco bo mu Karere ka Burera, Umuyobozi w’Akarere, MUKAMANA Soline yababwiye  ati:"Igihugu cyacu gifite Abayobozi beza batekereza buri gihe ku byateza imbere Umuturage n’Igihugu muri rusange.  Ni yo mpamvu Ubuyobozi Bukuru bw’Igihugu bwashizeho Ibigo nk’ibi by’igororamuco  aho abantu bakoze ibikorwa birimo ibyatumye muzanwa kugororwa bazanwa, bakigishwa imyuga itandukanye n’indangagaciro ; bamara kugororwa, bahindutse bagasubira mu buzima busanzwe; bagafatanya n’abandi mu iterambere."

Umuyobozi w’Akarere yabwiye kandi abagororerwa muri ibi Bigo Ngororamuco bo mu Karere ka Burera ati:"Nimusoza igororamuco musubiye mu buzima busanzwe, muzagaragaze ko mwahindutse kugira ngo mugirirwe icyizere; kandi muzabyaze umusaruro imyuga mwigiye mu Bigo Ngororamuco."

Gusura ibi Bigo Ngororamuco byakozwe mu rwego rw'ubufatanye bw'inzego bireba mu kunoza igororamuco ry'abagororerwa mu bigo Ngororamuco no kubategura gusubira mu buzima busanzwe.

Umwe mu bagororerwa mu Kigo Ngororamuco cya Iwawa wo mu Karere ka Burera witwa TURIKUMWE Gilbert yagize ati:" Nazanwe kugororwa kubera ninjizaga mu Gihugu ikiyobyabwenge cya Kanyanga; nkanagikwirakwiza. Hano mu Kigo Ngororamuco cya Iwawa; ndi mu bigishijwe umwuga w’ububaji. Ubu nakora intebe, ameza, itabureti, urugi n’ibindi bitandukanye bikorwa mu mbaho."

TURIKUMWE yagize kandi ati:"Twigishijwe kandi indangagaciro zikwiriye Umunyarwanda mwiza harimo gukunda Igihugu, gukunda no kunoza umurimo, gukunda umuryango, kwizigama no gukorera ku intego. Amasomo twaherewe hano i Wawa yatuye mpinduka; nkaba nararetse ibyatumye nzanwa hano i Wawa. Ninsoza igororamuco nsubiye mu buzima busanzwe, nzagaragaza ko nahindutse; mfatanye n’abandi baturage mu kurwanya iboyobyabwenge aho biva bikagera; kandi mbyaze umusaruro ubumenyi nigiye hano."

Undi witwa TWIZEYIMANA Jean Marie Vianney yagize ati:"Ndi hano mu Kigo Ngororamuco cya Iwawa kubera kugura ibyibano. Muri iki kigo nahigiye umwuga w’ubwubatsi. Ubu nshobora gutereka inzu nshaka mu kibanza. Ku masomo y’imyuga nigishijwe hiyongeraho amasomo y’indangagaciro zirimo gukunda Igihugu, gukunda umuryango no gukorera ku gihe. Aya masomo yatumye mpinduka, mfata umwanzuro wo kureka ibyatumye nzanwa kugororwa. Ndashima Ubuyobozi Bukuru bw’Igihugu cyacu bwashyizeho Ikigo Ngororamuco cya Iwawa aho abakoze ibikorwa bibi nkatwe bazanwa, bakigishwa imyuga n’indangagaciro; bamara guhinduka bagasubira mu  buzima busanzwe aho bafatanya n’abandi mu iterambere."

Abagororerwa i Wawa bagaragarije Abayobozi babasuye ubumenyi bamaze kunguka mu masomo bahabwa.