Mu kiganiro Umuyobozi w’Akarere, Mukamana Soline yagiranye n'abaturage b'Imirenge ya Rusarabuye, Rwerere na Cyeru bitabiriye ibirori byo kwizihiza Umunsi Mpuzamahanga w'Abantu bafite ubumuga byabereye mu Kagari ka Ndago ku wa mbere tariki 02 Ukuboza 2024 yasabye abantu bafite ubumuga bo mu Karere ka Burera kwigirira icyizere ko bashobora gukora ibintu bitandukanye bibateza imbere. 

Ibirori byo kwizihiza uyu munsi Mpuzamahanga byabereye mu Mirenge yose igize Akarere ka Burera. Uyu mwaka, uyu munsi wizihijwe ku insanganyamatsiko igira iti:" Kuzamura uruhare rw'Abantu bafite ubumuga mu miyoborere, twubaka ejo haza." 

Ibi birori byabereye mu Kagari ka Ndago byitabiriwe n’Umuyobozi w’Akarere wungirije ushinzwe imibereho myiza y’abaturage, Mwanangu Théophile, Intumwa y'Intara y'Amajyaruguru, Abafatanyabikorwa banyuranye n’amagana y’abaturage batuye iyi Mirenge.

Mu byaranze ibirori byo kwizihiza uyu munsi Mukuru harimo koroza bamwe mu bafite ubumuga bahawe Inka, kumurika bimwe mu bikorwa n'abantu bafite ubumuga birimo ibikapu bidodwa n'itsinda ririmo abantu bafite ubumuga n'ubuhamya bwa bamwe mu bafite ubumuga biteje imbere. Hari kandi umukino mwiza Ikipe y'Akarere ka Burera ya Sitball y'abantu bafite ubumuga beretse abitabiriye ibirori byabereye mu Kagari ka Ndago. 

Mu ijambo rye, Umuyobozi w’Akarere yagize ati:"Kugira ubumuga ntibivuga iherezo ry’ubuzima. Kuba umuntu afite ubumuga ntibivuga ko nta cyo yakora ngo yiteze imbere. Hari ibintu byinshi yakora, ingero z’abantu bafite ubumuga biteje imbere ni nyinshi. Icy’ingenzi ni ukwigirira icyizere ko ushoboye; ubundi ibyo ushoboye ukabikora neza."

Yagaragaje ko hari abagihisha abantu bavukanye ubumuga; babafata nk’abatafite umumaro, ndetse ko ari umutwaro ku muryango; abibutsa ko uburenganzira bw’abantu bafite ubumuga burimo kwiga no kuvuzwa bugomba kubahirizwa; asaba uwagira amakuru yerekeye abantu babangamira uburenganzira bw’abantu bafite ubumuga kuyatanga mu nzego zibishinzwe.

Mu bitabiriye ibirori byabereye mu Kagari ka Ndago harimo umubyeyi witwa Uwamahoro Gloria ufite ubumuga bwo kutabona wavuze umuvugo asoma akoresheje intoki aho yawanditse mu nyandiko ya Braille; uyu akaba kandi ari Umwarimu w’Icyongereza n’Ikinyarwanda ku Ishuri ryisumbuye rya Kirambo riri mu Murenge wa Cyeru.