Muri gahunda y'URUHARE RWANJYE MU ISIBO; mu gitondo cy'uyu wa kabiri tariki 21 Mata 2026, Umuyobozi w'Akarere, Mukamana Soline yafatanyije n'abatuye Isibo y'UBUNYANGAMUGAYO, mu Mudugudu wa Rutuku, Akagari ka Kabona, Umurenge wa Rusarabuye kubakira umuturage uhatuye ubwiherero; ufite amikoro make.

Mu kiganiro yagiranye na bo yabakanguriye kugira isuku umuco, gufatanya kurwanya ibyabangamira imibereho myiza n'iterambere ryabo birimo kwishora mu biyobyabwenge, amakimbirane, ubusinzi, ubuzererezi, gusesagura no gukoresha nabi umutungo w’umuryango, ihohotera ririmo irishingiye ku gitsina, iribera mu ngo n’irikorerwa abagore n’abana.

Yagize ati:"Nk’uko iyi gahunda twayise "URUHARE RWANJYE MU ISIBO" igamije ubufatanye bw'abatuye Isibo mu gukemura ibibazo bibangamiye imibereho myiza. Abashize hamwe ku neza y'umuturage n'Igihugu nta kibananira."

Yabashimiye ubufatanye bukomeje kubaranga mu bikorwa birimo kubakira abatishoboye ubwiherero, ingarani, ibimoteri, udutanda two kwanikaho amasahane, gutunganya imihanda n'inzira z'imigenderano; abasaba gukomeza kwitabira ibikorwa bigamije iterambere

Yabakanguriye kwizigamira muri Ejo Heza no kongera ubwizigame, kugira isuku umuco, gutanga Mituweli ya 2026-2027, kwita ku burere n'uburezi bw'abana babatoza kurangwa n’indangagaciro na kirazira by’umuco Nyarwanda, kubahiriza amabwiriza agamije kwirinda ibiza; bazirika neza ibisenge by'inzu, bacukura, banasibura imirwanyasuri; kandi bakayobora amazi ahatateza ibiza, isuri n’ibyago.

Muri icyo kiganiro kandi, Umuyobozi w'Akarere yakanguriye ababyeyi kwita ku buzima bw’Umubyeyi n’ubuzima bw’Umwana mu minsi 1,000 ya mbere y’ubuzima bwe, bakipimisha inda inshuro umunane, bagafata ibinini byongera amaraso, bakabyarira kwa Muganga, bagakingiza abana inkingo zose esheshatu, bagapimisha abana imikurire, bakubahiriza n’ubundi burenganzira bw’umwana burimo kwiga, kurindwa ihohoterwa, kumokoresha imirimo itemewe no kumucuruza.

Yabibukije ko umutekano ari ishingiro ry'iterambere n'amahoro birambye; abasaba kuwubumbatira; batangira ku gihe amakuru yatuma hakumirwa icyawuhungabanya; yanatuma hafatwa vuba uwagikoze. 

Gahunda y’URUHARE RWANJYE MU ISIBO yashyizweho mu Karere ka Burera; aho abakozi guhera ku bakorera ku rwego rw'Akarere kugera ku rwego rw'Akagari buri wese yatomboye Isibo akurikirana; aho afatanya n'abayituye gushaka ibisubizo by'ibibazo bibangamiye imibereho myiza yabo.