Umuyobozi w’Akarere ka Burera, Mukamana Soline yatanze ubu butumwa ku wa kane tariki 05 z’uku Kwezi mu birori yitabiriye byo gusoza umwaka wa gatandatu w'amashuri abanza n'umwaka wa gatatu w'amashuri y’inshuke; umwaka w’amashuri wa 2023-2024 by’Ishuri ribanza rya Kirambo, mu Murenge wa Cyeru aho yakiriwe n’Umuyobozi w’iri shuri, Mukarutwaza Alphonsine.

Uyu muhango witabiriwe n'ubuyobozi bw'iri shuri, abarimu bahigisha, ababyeyi b'abana bahiga, abafatanyabikorwa b'iri shuri n'abanyeshuri.

Mu byaranze uyu muhango harimo urugendo rugufi rwo kwishimira intsinzi y’abanyeshuri aho iki kigo cyatsindishije abanyeshuri bose mu mwaka w’amashuri wa 2023-2024; guha abanyeshuri ubufasha bw'ibikoresho by'ishuri harimo amakaye manini n’amatoya, impano n'ibyemezo by'ishimwe ku barimu.

Mu ijambo rye, Umuyobozi w'Akarere, Mukamana Soline yasabye ababyeyi gukundisha abana ishuri, bababwira ibyiza byo kwiga, kubaha ibyangombwa nkenerwa harimo ibikoresho by’ishuri no kuzuza inshingano zijyanye na gahunda yo kugaburira abanyeshuri ku Ishuri saa sita.

Yagize ati:"Muri ibi bihe, umurage ufite agaciro kurusha iyindi ni ukwigisha umwana, akarangiza ishuri. Umuntu wize abasha gushakisha imibereho akoresheje ubumenyi yakuye mu ishuri. Tuzirikane ko abana bacu ari bo bazavamo Abayobozi mu nzego zitandukanye z’Igihugu. Uburyo bwiza bwo kubategura kugira ngo bazavemo abayobozi beza basohoza neza inshingano zabo ni ukubohereza ku ishuri; kandi tukirinda kuribakuramo; cyangwa kuribasibya kuko bigira ingaruka mbi ku iterambere ry’imyigire yabo, ndetse n’abo twifuza ko bazaba bo."

Umuyobozi w'Akarere yasabye abarezi gukomeza kurangwa n’umuhate wo gukunda akazi, gukorera hamwe no guhatanira kwigisha abana bagatsinda, guharanira umunsi ku wundi guhanga udushya mu myigishirize tugamije kuzamura ireme ry’ububurezi; bityo, abana bigisha bazigirire akamaro, bakagirire imiryango yabo, Umuryago Nyarwanda n’Igihugu muri rusange.