Mu cyumba cy'inama cy'Akarere habereye igikorwa cyo kwibuka Urubyiruko rwo mu Karere ka Burera rwazize Jenoside yakorewe Abatutsi mu Rwanda mu 1994.

Iki gikorwa cyaranzwe no gufata umunota wo kwibuka abazize Jenoside yakorewe Abatutsi mu Rwanda mu mwaka wa 1994, gushyira indabo ku Rwibutso rwa Jenoside yakorewe Abatutsi ruri mu Murenge wa Rusarabuye mu rwego rwo guha icyubahiro abazize Jenoside yakorewe Abatutsi bahashyinguwe, ijambo ry'ikaze ry’Umuyobozi w’Akarere wungirije ushinzwe imbereho myiza y’Abaturage, MWANANGU Theophile, ikiganiro ku Mateka ya Jenoside yakorewe Abatutsi mu Rwanda mu mwaka wa 1994 n'ijambo ry'Umunyamabanga Nshingwabikorwa ushinzwe Ubushakashatsi muri Minisiteri y’Ubumwe bw’Abanyarwanda n’Inshingano Mboneragihugu,MUGABOWAGAHUNDE Maurice; akaba ari na we wari Umushyitsi Mukuru.

Iyi gahunda yitabiriwe n'Umuyobozi w'Ingabo mu Karere, Lt Col Sam MWESIGYE, Umuyobozi w'Inkeragutabara mu Karere, Umuyobozi wa Polisi mu Karere, SP Aphrodis NKUNDINEZA, Visi Perezidante w'Inama Njyanama y'Akarere, UWAMWIZA Catherine, Umuhuzabikorwa w'Inama y'Igihugu y'Urubyiruko ku rwego rw'Akarere, BUNANE Theoneste n'abandi Bayobozi bari bahagarariye izindi Nzego zitandukanye mu Karere.

Mu ijambo rye, Umuyobozi w’Akarere wungirije ushinzwe imbereho myiza y’Abaturage, MWANANGU Theophile yagize ati:" Muri uyu mwanya twibuka urubyiruko rwazize Jenoside yakorewe Abatutsi ni ngombwa kuzirikana urubyiruko rwahoze ari urwa FPR/INKOTANYI rwitanze rukabohora Igihugu ; rukanahagarika Jenoside yakorerwaga Abatutsi. Ugukunda Igihugu n’abagituye n’izindi ndangagaciro byaranze urwo rubyiruko bikwiye kubaranga."

Yavuze ko urubyiruko rukwiye gusobanukirwa; rukamenya amateka ya Jenoside yakorewe Abatutsi; hagamijwe kugira ngo rumenye uko yateguwe, uko yashyizwe mu bikorwa, uko yahagaritswe, ingaruka zayo no kubasobanurira uruhare rwabo mu ishyirwa mu bikorwa rya gahunda zigamije ubumwe n’ubudaheranwa bw’Abanyarwana; ndetse n’uruhare rwabo mu gukumira no kurwanya ingengabitekerezo ya Jenoside, ipfobya ndetse n’ihakana ryayo.

Mu butumwa bwe; MUGABOWAGAHUNDE yagize ati:"Mbere na mbere mbanje kubihanganisha muri iki gikorwa ngarukamwaka cyaduteranije hano cyo kwibuka ku nshuro ya 29 Jenoside yakorewe Abatutsi mu 1994 igahitana abarenga Miliyoni mu minsi itarenze ijana."

Yakomeje agira ati:"By’umwihariko; kuri uyu munsi turibuka ; kandi turunamira urubyiruko rwazize Jenoside yakorewe Abatutsi tugamije kumenya no gusobanurira urubyiruko rw’u Rwanda amateka ya Jenoside yakorewe Abatutsi n’ingengabitekerezo yayo kugira ngo rubashe kuyirwanya no kubaka u Rwanda ruzira Jenoside. Urubyiruko rufite uruhare rinini mu kurwanya no gukumira ihakana n’ipfobya rya Jenoside yakorewe Abatutsi".

MUGABOWAGAHUNDE yagize kandi ati:"Jenoside yarateguwe; ishyirwa mu bikorwa amanywa n’ijoro; kandi urubyiruko rwinshi rwayigizemo uruhare rutaziguye; ahanini biturutse  ku kutamenya gushishoza no guhitamo ibikwiye; inda nini, urwango bigishijwe n’ibindi. Ku rundi ruhande ariko; urubyiruko rw’Inkotanyi rwari rwarahejejwe ishyanga na Leta mbi, rwafashe iya mbere mu kurwanya akarengane; kurengera bamwe mu Banyarwanda bari baravukijwe uburenganzira bwabo mu gihugu imbere no hanze; ndetse bahagarika Jenoside  yakorerwaga Abatutsi. Indangagaciro z’ubutwari, gukunda igihugu, ubwitange, umurava , kunamba gukoresha bike ukagera kuri byinshi, gushyira imbere ukuri n’izindi ndangagaciro ni byo byabafashije  gutsinda urugamba rwo kubohora Igihugu no guhagarika Jenoside yakorerwaga Abatutsi."

Yagize na none ati:" Rubyiruko, amahitamo yo kubaka u Rwanda ku bumwe bw’Abanyarwanda ni yo atumye tugira Igihugu mubona ubu. Aya mahitamo agomba kuba aya buri Munyarwanda; ariko cyane cyane ayanyu Urubyiruko. Igihango cy’Urungano gishingiye kuri ayo mahitamo; ni na yo sano mufitanye y’Ubunyarwanda. Nta cyasumba rero icyo gihango. Mugomba kugikomeraho; mwirinda kugitatira."